Iraktan qaıtarylǵan balalardyń eń kishkentaıy 2 jasqa da tolmaǵan – SІM

NUR-SULTAN. QazAqparat – QR SІM erekshe tapsyrma jónindegi elshisi Stanıslav Vasılenko Iraktan qaıtarylǵan balalardyń ekeýi ǵana Qazaqstanda týǵanyn aıtady, dep habarlaıdy QazAqparat tilshisi.

Stanıslav Vasılenko - Irakqa jedel toppen birge ushyp baryp, balalardy Qazaqstanǵa alyp kelýge jaýapty bolǵandardyń biri.

«Bul – 7-8 aı boıy júrgizilgen tolaǵaı jumystyń nátıjesi. Ózderińiz BAQ arqyly bilgendeı, qazaqstandyq analar men balalar Iraktaǵy túrmeler men balalar úıinde bolǵan. Ol jaqtan barlyq qazaqstandyq balany alyp shyqtyq. Olardyń bireýi – tul jetim. Áke-sheshesi, qaryndastary men baýyrlary ǵımarattaǵy jarylys kezinde qaıtys bolǵan», - dedi Stanıslav Vasılenko elordada ótken baspasóz máslıhatynda.

Onyń aıtýynsha, Qazaqstanǵa qaıtarylǵan balalardyń kóbi Irak aýmaǵynda dúnıege kelgen. Ekeýi ǵana Qazaqstanda týǵan.

«Memlekettik organdardan qurylǵan arnaıy top osy operatsııany júrgizdi. 14 balanyń 12-si - tórt otbasynyń músheleri. 14 balanyń 8-i - qyz, 6-aýy - ul bala. Eń úlkeni – 12 jastaǵy er bala. Qazaqstanda týǵan. Eń kishisi – 2 jasqa da tolmaǵan qyz bala. Shynymyzdy aıtsaq, Baǵdatta bári tynysh dep oılaımyz. Biraq, jaǵdaı olaı emes. Demonstratsııalar men qaqtyǵystar bolyp jatyr. Ár kósheniń qıylysynda blok-beketter tur. Ásker qalaǵa kirgizilgen. Bári tynysh deýge kelmeıdi», - dedi ol.

Eske sala ketsek, QR Prezıdenti Qasym-Jomart Toqaevtyń tapsyrmasy boıynsha júzege asyrylǵan gýmanıtarlyq aktsııa nátıjesinde Irak túrmesinde óz analarynyń janynda jatqan 14 qazaqstandyq bala eline qaıtarylǵan bolatyn.