Iraktaǵy iri gaz ken oryndarynyń birinde óndiris toqtady
ASTANA. KAZINFORM — Iraktyń Kúrdistan aımaǵynda energetıkalyq nysandarǵa shabýyl jalǵasyp jatqandyqtan, elektr jabdyqtaý júıesi qaıtadan isten shyqty, dep habarlaıdy Kazinform agenttiginiń menshikti tilshisi.
8 qarasha kúni keshke Iraktyń soltústigindegi Súleımanııa provıntsııasynda ornalasqan Hor-Mor gaz ken ornyna dronmen soqqy jasaldy. Shabýyldan órt shyǵyp, gaz óndirý tolyǵymen toqtady. Bul týraly dúısenbi kúni málimdeme taratqan BAÁ-niń Dana Gas kompanııasy habarlady.
Operator kompanııanyń habarlaýynsha, órt tolyq sóndirilgen, qyzmetkerler zardap shekpegen. Shyǵyn kólemi anyqtalǵansha gaz óndirý toqtap tur. Al ken ornynyń jumysy qashan jandanatyny ázirge belgisiz.
Shabýyldan keıin óńirdegi jalpy qýaty 2,8 GVt bolatyn elektr óndirý nysandary isten shyqty. Osyǵan baılanysty Iraktyń soltústigindegi jartylaı avtonomııalyq Kúrdistan aımaǵynyń birqatar aýdanynda elektr jaryǵy sóndi.
Reuters agenttigi Irak Kúrdistanynyń energetıka mınıstrligindegi derekkózderge silteme jasap, soqqy suıytylǵan kómirsýtek gazy saqtalǵan rezervýarǵa tıgenin habarlady.
Al soqqydan keıin nysan qyzmetkerleri qaýipsiz oryndarǵa evakýatsııalandy.
Irak Kúrdistanynyń Tabıǵı resýrstar jáne elektr energetıkasy mınıstrlikteri bul oqıǵany terrorlyq áreket dep atap, onyń zardabyn azaıtýǵa baǵyttalǵan sharalar qabyldanyp jatqanyn málimdedi.
Buǵan qosa dúısenbi kúni Irak premer-mınıstri Álı Faleh áz-Zaıdı shabýyldyń mán-jaıyn tergeý úshin federaldyq bılik pen Irak Kúrdistany úkimetiniń ókilderinen birlesken tergeý komıssııasyn qurýdy tapsyrdy.
Shafaq agenttiginiń jergilikti derekkózderge silteme jasap habarlaýynsha, dron Salah-ad-Dın provıntsııasyndaǵy Týz-Hýrmatý qalasynyń mańyndaǵy taýly aımaqtan ushyrylǵan bolýy múmkin. Bul aqparat ázirge resmı túrde rastalǵan joq.
Sondaı-aq ázirge eshbir top shabýylǵa qatysy baryn málimdemedi.
Aıta keteıik, Hor-Mor – Iraktaǵy eń iri gaz ken oryndarynyń biri ári Kúrdistan aımaǵyndaǵy elektr stantsııalaryna otyn jetkizetin negizgi kóz. Ken ornyn BAÁ-niń Dana Gas jáne Crescent Petroleum kompanııalary kiretin Pearl Petroleum konsortsıýmy ıgeredi.
Ken ornyna buǵan deıin de birneshe ret dronmen shabýyl jasalǵan. 2024 jylǵy sáýirdegi soqqydan tórt sheteldik jumysshy qaza tapty. Al 2025 jylǵy qarashada bolǵan taǵy bir shabýyl kezinde gaz rezervýarynda órt shyǵyp, elektr stantsııalaryna otyn jetkizý toqtatyldy.
2026 jylǵy shildede aımaqtaǵy ahýal shıelenisip, qaýipsizdikke qater tóngendikten, Dana Gas kompanııasy ken ornyndaǵy gaz óndirýdi ýaqytsha toqtatqan edi.
Sonymen qatar kúrd bıligi buǵan deıin mundaı shabýyldarǵa Iran qoldaıtyn qarýly toptardy aıyptaǵan.
Eske sala keteıik, buǵan deıin AQSh Iraktaǵy DAISh-ke qarsy mıssııasyn aıaqtaǵanyn habarlaǵan bolatynbyz.
