Irakta jergilikti bılik organdaryna saılaý ótetin kúni birneshe jarylys boldy
ÁBÝ-DABI. 20 maýsym. QazAqparat - Búgin Iraktyń Anbar men Naınava provıntsııalarynda jergilikti bılik organdaryna saılaý bastaldy.
Jergilikti BAQ-tyń habarlaýynsha, saılaý kúni eki provıntsııanyń ákimshilik ortalyqtary Er-Ramadı (Anbar) men Mosýl (Naınava) qalalaryndaǵy birneshe kúshti jarylystan bastaldy.
Anbar provıntsııasyndaǵy saılaý ýchaskelerinde kem degende 5 jarylys boldy. Solardyń biri Er-Ramadıdiń ortalyq stadıonynda bolǵany belgili. Aldyn ala málimetter boıynsha, bir adam qaza bolǵan, úsheýi jaraqat alǵan. Mosýlda toǵyz jarylys oryn alǵan. Turǵyndar din aman. Soǵan qaraǵanda bul tek saılaýshylardy qorqytý áreketi bolsa kerek.
Irak bılik organdaryna saılaý bıylǵy jyldyń 20 sáýirinde 12 provıntsııada ótkizildi, tek sýnnıter turatyn eki aımaǵynda ǵana qaýipsizdik úshin keıinge qaldyryldy.
