Irakta jalpyulttyq saılaýdyń daýys berý úderisi aıaqtaldy

ASTANA. KAZINFORM — Irakta jalpyulttyq saılaýda daýys berý kezeńi resmı túrde aıaqtalyp, eldegi saılaý ýchaskeleri jabyldy, dep habarlaıdy Anadolý.

Eldiń Táýelsiz Joǵary saılaý komıssııasy búkil el aýmaǵynda daýys berý aıaqtalǵanyn jáne saılaý ýchaskeleriniń jabylǵanyn habarlady.

Komıssııanyń málimetinshe, saılaý barysynda eshqandaı tehnıkalyq nemese ákimshilik zańbuzýshylyqtar tirkelmegen.

Bul jolǵy jalpyulttyq saılaýda Irak parlamentindegi 329 oryn úshin 7 744 kandıdat baq synady.

Joǵary saılaý komıssııasy saılaý nátıjeleri daýys berý ýchaskeleri jabylǵannan keıin 24 saǵat ishinde jarııalanatynyn málimdedi.

Iraktaǵy parlament saılaýy eldiń jańa prezıdentin jáne premer-mınıstrin tańdaý jumysynyń bastalýyna jol ashady. Konstıtýtsııalyq dástúrge sáıkes, negizinen sımvolıkalyq qyzmet sanalatyn prezıdent laýazymy kúrd ókilderine beriledi. Al premer-mınıstrdi anyqtaý jáne jańa úkimetti qurý saıası kelisim negizinde júzege asatyndyqtan, bul úderis birneshe aıǵa sozylýy múmkin.

Eske sala ketsek, buǵan deıin Irakta parlament saılaýynda daýys berý bastalǵanyn jazdyq.