Irakta zańsyz jumys istegen 20 Qazaqstan azamaty ustaldy

ASTANA. QazAqparat – 20 otandasymyz Irak Respýblıkasynda zańsyz eńbek etken. Qazaqstan elshiligi ustalǵan jerlesterimizdi sottyń qaraýynsyz deportatsııalaý týraly kelisimge qol jetkizgen. Bul týraly Syrtqy ister mınıstrliginiń resmı ókili Aıbek Smadııarov málim etti, dep habarlaıdy QazAqparat tilshisi.

«Bıyl naýryz aıynyń sońynda Irak Respýblıkasynyń quqyq qorǵaý organdary zańsyz eńbek qyzmetin júzege asyrǵany úshin Qazaqstannyń 20 azamatyn ustady. Qazaqstannyń Iordanııadaǵy jáne Iraktaǵy elshiligi jergilikti organdarmen sot qaraýynsyz deportatsııalaý týraly ýaǵdalastyqqa qol jetkizdi. Qazir ustalǵan azamattar aıyppul tólep Iran aýmaǵynan shyǵyp ketti», - dedi Aıbek Smadııarov mınıstrlikte ótken baspasóz máslıhatynda.

Onyń aıtýynsha, buǵan deıin de osyǵan uqsas oqıǵa bolǵan.

«Bıyl aqpanda Qazaqstannyń 7 azamaty Irak Respýblıkasynyń sheteldikterdiń bolýy týraly zań normalaryn buzǵany týraly, atap aıtqanda, jasyryn kazınoda zańsyz eńbek etkeni úshin tergeýge tartylǵan bolatyn. Bizge málim bolǵandaı, ótken jyldyń qarasha aıynda olardyń 5-i ustalyp, sot qaraýyna deıin kepilmen bosatylǵan. Osyǵan qaramastan jerlesterimiz Irakka qaıta oralyp, eldiń zańnamasyn qaıtadan buzdy. Qazaqstan elshiligi shuǵyl kómek kórsetýdi uıymdastyrǵan. Sondaı-aq, sot jáne prokýratýramen kelissózder ótti», - deıdi ol.

Sondaı-aq, A.Smadııarovtyń aıtýynsha, joǵaryda atalǵan zańbuzýshylyq úshin bir jylǵa deıin bas bostandyǵynan aıyrýy nemese 500 myńnan 3 mln ırak dınaryna deıin aıyppul salynýy múmkin.

«Atalǵan azamattar Irak Respýblıkasyna tıisti qujatsyz jáne zańsyz eńbek etý maqsatynda barǵany belgili boldy. Osy oraıda otandastarymyzdy basqa eldiń zańnamasyn saqtaýǵa shaqyramyz», - deıdi SІM resmı ókili.