Irakta sottalǵan Qazaqstan azamattaryna qatysty kelissóz jalǵasady - SІM
«Osydan birneshe jyl buryn Iraktan «Rýsafa» operatsııasy aıasynda búldirshinder Qazaqstanǵa jetkizildi. Alaıda olardyń analary ómir boıyna bas bostandyǵynan aıyrylyp, Baǵdat (Irak) túrmesinde jazasyn óteýge qaldy. Bıyl 24 sáýirde Qazaqstannyń Iordanııadaǵy elshiligine terrorıstik uıymnyń qyzmetine qatysqany úshin ómir boıyna bas bostandyǵynan aıyrý týraly Irak bıliginiń úkimine narazylyq retinde Baǵdattaǵy Rýsafa-6 atty túrmesinde otyrǵan sheteldikter, onyń ishinde Qazaqstan azamattary da ashtyq aktsııasyn bastaǵany týraly habarlama tústi», - dedi A. Smadııarov elordada ótken baspasóz máslıhatynda.
Osy oraıda ol isti bolǵan atalǵan adamdar óz memleketterine tezirek ekstradıtsııalaý protsedýrasyn ótkizýdi talap etip otyr. Ashtyq aktsııasy Irak bıliginiń «Raqymshylyq týraly» zańǵa qol qoıýy týraly qaýeset taraǵan kezde bastalǵan.
«Qolda bar aqparatqa sáıkes, Irak bıligi bıyl barlyq sanatta qylmys jasaǵan adamdarǵa «Raqymshylyq jasaý týraly» zańǵa qol qoıýdy josparlap otyr. Bul naqty aqparat emes. Aıta keteıik, raqymshylyqqa iligetin adamdar óz jazasynyń úshten birin sol elde óteýge tıis. Qazir joǵaryda atalǵan mekemede DAISh terrorıstik (Qazaqstanda tyıym salynǵan uıym) uıymyna qatysqany úshin sottalǵan 6 Qazaqstan azamaty óz jazasyn ótep jatyr. Jalpy, narazylyq bildirip otyrǵandar ádiletsiz úkimge, negizsiz aıyptaýlarǵa qatysty shaǵym aıtyp otyr», - dedi resmı ókil.
«Eger Irak bıligi raqymshylyq aktsııasyn qabyldasa, onda biz tıisti kelissózderdi jalǵastyramyz», - dedi A. Smadııarov.
Budan buryn habarlanǵandaı, 2019 jyldyń qarashasynda Iraktan 14 bala Qazaqstanǵa jetkizildi.
Olardyń analary sottalyp, terrorıstik áreketke qatysy úshin túrmede jazasyn ótep jatyr. Atalmysh gýmanıtarlyq aktsııa balalardyń analary men týǵan-týystarynyń suraýy boıynsha uıymdastyryldy.
