Irakta parlamenttik saılaý qańtar aıynyń 21-ine aýystyrylýy múmkin - Ortalyq saılaý komıssııasy
ASTANA. Qarashanyń 10-y. QazAqparat - Irakta parlamenttik saılaý 2010 jyldyń qańtar aıynyń 21-ine aýystyrylýy múmkin. Daýys berýdi qańtardyń 16-synan 21-ine aýystyrý týraly ótinish prezıdenttik keńestiń bekitýine jóneltildi,
dep habarlady dúısenbi kúni Iraktyń Ortalyq saılaý komıssııasynyń basshysy Faradj ál-Haıdarı.
Buǵan deıin Faradj ál-Haıdarı, saılaý komıssııasynyń qańtardyń 16-syna josparlanǵan parlamenttik saılaýǵa daıyndalyp úlgermeıtinin málim etken bolatyn. «Saılaýdy halyqaralyq standarttarǵa saı ótkizý úshin, bizge qosymsha ýaqyt kerek», dep atap kórsetken ál- Haıdarı, berilgen 2 aı merzimniń búkil el boıynsha 50 myń daýys berý qosynyn uıymdastyrýǵa jetpeı qalýy yqtımal ekenin aıtyp otyr.
Birneshe talpynystan keıin ótken jeksenbi kúni Irak parlamenti saılaý týraly jańa zań qabyldaǵan bolatyn. Eldegi jaǵdaıdyń turaqtanýyna jáne sheteldik áskerlerdiń elden shyǵarylý kestesine qatysty osy zańnyń keshiktirilip qabyldanýy parlamenttik saılaýdyń merzimin aýystyrýǵa sebep bolyp otyr.
