Irakta parlament saılaýynda daýys berý bastaldy
ASTANA. KAZINFORM — Jalpyhalyqtyq daýys berý jańa parlamenttiń quramyn jáne el úkimetiniń aldaǵy tórt jylǵa qurylýyn anyqtaıdy, dep habarlaıdy Kazinform menshikti tilshisi.
Irakta seısenbi kúni 329 oryndyq parlamentke saılaýǵa arnalǵan ýchaskeler ashyldy. Shamamen 21 mıllıon azamat daýys berý quqyǵyna ıe. Táýelsiz Joǵary saılaý komıssııasynyń (IHEC) habarlaýynsha, daýys berý jergilikti ýaqyt boıynsha tańǵy saǵat 07.00-den keshki 18:00-ge deıin, merzimderdi uzartýsyz ótedi.
Komıssııanyń málimetinshe, saılaýǵa 18 provıntsııadan 7745 kandıdat tirkelgen, onyń ishinde 2247 áıel bar. Olardyń 4445-i koalıtsııalardan, 3225-i saıası partııalardan jáne 75-i táýelsiz kandıdattar retinde usynylǵan. Budan basqa, 53 kandıdat saılaýǵa hrıstıandar, ıazıdter, sabeı-mandaıtter, shabaktar jáne feılı kúrdterin qosa alǵanda dinı jáne etnıkalyq azshylyqtarǵa arnalǵan kvota júıesi boıynsha qatysady.
Polls have opened in Iraq, where voters will elect a new parliament and leader of the house in a vote that will be closely watched in Iran and the US.
— Al Jazeera English (@AJEnglish) November 11, 2025
🔗: https://t.co/vHOxf0rFvZ pic.twitter.com/L8YOgiDGKN
Kandıdattardyń eń kóp sany Baǵdadta tirkelgen — 2293 adam, odan keıin Djı-Kar (569) jáne Basra (568) tur. Qatysýshylardyń eń az sany Mısanda (141) jáne Dohýkta (59) tirkeldi.
Baǵdadta daýys bergen Irak premer-mınıstri Muhammad Shıa as-Sýdanı saılaýdyń «qaýipsiz jáne turaqty jaǵdaıda» ótip jatqanyn málimdedi.
— Bul saılaý bılikti beıbit jolmen berý qaǵıdatyn rastaıdy jáne úkimet buǵan erekshe nazar aýdardy, — dep atap ótti ol baspasóz máslıhatynda.
Saılaý komıssııasynyń ókili Omar Mohamedtiń aıtýynsha, daýys berý protsesi kúsheıtilgen qaýipsizdik jaǵdaıynda «tynysh jáne uıymdastyrylǵan» bolyp ótip jatyr. Saılaýdy baqylaý úshin 300-den astam halyqaralyq baqylaýshy jáne Arab memleketteri lıgasy men BUU ókilderin qosa alǵanda shamamen 1500 tilshi akkredıttelgen.
BUU-nyń Iraktaǵy arnaıy ókili jáne BUU-nyń bul elge kómek kórsetý mıssııasynyń (UNAMI) basshysy Mohammed Ál-Hassan saılaýdy «barlyq ıraktyqty biriktirgen demokratııalyq mereke» dep atady.
— Mıssııa Irak qurylymdary tolyq qamtamasyz etip otyrǵan saılaýdyń uıymdastyrylýy men ótkizilýine qanaǵattanyp otyr, — dep atap ótti ol.
Irak Іshki ister mınıstrligi Kırkýkte úmitkerlerdiń biriniń úıiniń mańynda túnde bolǵan oqıǵadan keıin eki polıtsııa qyzmetkeriniń qaza tapqanyn habarlap, jaǵdaıdyń jalpy baqylaýda ekenin atap ótti.
Daýys berý qorytyndylary saılaý aıaqtalǵannan keıin 24 saǵat ishinde jarııalanady dep kútilip otyr, al resmı túrde rastaý kelip túsýi múmkin apellıatsııalyq shaǵymdar qaralǵannan keıin jasalady.
Aldyńǵy parlamenttik saılaý 2021 jyldyń 10 qazanynda, Adıl Abdýl-Mahdı úkimetiniń otstavkaǵa ketýine ákelgen jappaı narazylyqtardan keıin ótti. 2025 jyly saılanǵan jańa parlament prezıdentti saılaıdy jáne dástúrli túrde konfessııalyq tepe-teńdik qaǵıdattaryna negizdelip qurylatyn úkimetti bekitedi: premer-mınıstr — shııt, prezıdent — kúrd jáne parlament spıkeri — sýnnıt.
Irak premer-mınıstri Muhammed Shıa as-Sýdanı 2022 jyldan beri shııt partııalarynyń qoldaýymen qyzmet etip keledi, eger onyń koalıtsııasy depýtattardyń kópshiliginiń qoldaýyna ıe bolsa, óz qyzmetin saqtap qalýǵa úmittenedi. Irak parlamenttik júıesinde premer-mınıstrdi partııaaralyq kelissózder qorytyndysy boıynsha parlament taǵaıyndaıdy.
Buǵan deıin Irakta parlament saılaýy qarsańynda arnaıy daýys berý ótkenin jazǵan edik.