Irakta Mosýl qalasyn azat etý operatsııasy bastaldy
ASTANA. QazAqparat - Iraktyń Mosýl qalasyn lańkesterden azat etý operatsııasy bastaldy, dep jazady «Habar 24».
Ázirge «Irak pen levant» sodyrlaryna qarsy AQSh pen Frantsııa áskerı áýe kúshteri soqqy berip jatyr. «CNN Turk» telearnasynyń habarlaýynsha, qurlyqtaǵy áskerı áreketter áli bastalmaǵan. Al sodyrlar bomba tastaıtyn ushaqtardyń nysanany dál kózdeýine jol bermeý úshin kólik rezeńkelerin órtepti. Oǵan qosa qala mańaıynan or qazyp, olarǵa janarmaı quıyp ot qoıǵan.
Aqparattarǵa qaraǵanda, Mosýl qalasynda shahardyń ózge bólikterimen qatynas jasaıtyn, tipti odan shyǵyp ketetin jer asty joly bar.
Eske sala keteıik, lańkester Irakta úlkendigi jaǵynan ekinshi orynda turǵan Mosýl qalasyn 2014 jyly basyp aldy. Túrli málimetterge qaraǵanda, onda 5 myń sodyr men 700 myń beıbit turǵyn bolýy múmkin.
