Irakta lańkestik saldarynan 60-qa jýyq adam qaza boldy
ASTANA. 18 mamyr. QazAqparat - Irak aýmaǵynda oryn alǵan lańkestik áreketterden juma kúni 60-qa jýyq adam qaza tapty, dep habarlaıdy Ýtro.rý jergilikti bılik ókilderine silteme jasap.
Eń iri lańkestik aktiler retinde Irak shyǵysyndaǵy Dııala provıntsııasynyń Baakýba qalasynda sýnnıttik meshittiń janynda bolǵan eki jarylysty aıtýǵa bolady. Munda 41 adam qaza boldy, keminde 57 adam jaralandy. Musylman jamaǵat juma namazdan shyǵyp kele jatqanda eki jarylǵysh zat iske qosylǵan.
Keıin Baǵdadtyń ońtústiginde ornalasqan Madaın qalasynda taǵy da eki jarylys boldy. Bombalar sýnnıtterdiń jerleý rásimi kezinde jarylyp, sonyń saldarynan 8 adam qaza taýyp, 25 adam jaraqat aldy. Sýnnıtterdiń Fallýdja qalasynda oryn alǵan jarylystan taǵy eki adam baqılyq bolyp, segizi jaralandy. Kırkýk qalasynda birneshe adam, sonyń ishinde memlekettik qyzmetshi atyp óltirildi.
Osyǵan deıin apta ishinde jarylystar saldarynan kem degende 49 adam qaza tapty, 153-i jaralandy. Jalpy mamyr aıynda elde 240 adam lańkestik qurbany boldy.
