Irakta lańkestik áreketteri úshin aıyptalǵan 26 adam darǵa asyldy
ASTANA. 21 qańtar. QazAqparat - Irakta terrorıstik is-áreketteri úshin aıyptalǵan 26 adam darǵa asyldy. Eldiń ádilet mınıstri Hasan ash-Shamarıdiń aıtýynsha, olardyń ishinde Baǵdad qalasyndaǵy «Sahva» jaýyngerler tobyn basqarǵan basty qylmysker de bar, dep habarlaıdy ITAR-TASS.
Sońǵy jyldary Irakta sheıitter men súnnıtterdiń, sondaı-aq túrli ult ókilderiniń arasynda qaqtyǵystar jıilep ketken. Birneshe myńdaǵan adam mert bolǵan.
Halyqaralyq narazylyqtarǵa qaramastan, Irak úkimeti adamdardyń qaza bolýyna kináli dep tapqan jaýyngerlerdi jappaı ólim jazasyna kesti. Nıý-Iorktegi Human Right Watch quqyq qorǵaý uıymynyń keltirgen málimetteri boıynsha, 2011 jyly 68 adam, 2012 jyly - 129, al 2013 jyly 151 adam darǵa asylyp óltirilgen.
