Irakta koronavırýs gospıtalindegi órt qurbandarynyń sany 124-ke jetti
KAIR. QazAqparat - Iraktyń ońtústigindegi Dı-Kar provıntsııasy An-Nasırııa qalasyndaǵy koronavırýs juqtyrǵan naýqastarǵa arnalǵan aýrýhanada órtten qaza tapqandardyń sany 124-ke jetti, dep habarlaıdy QazAqparat Al Hadath telearnasyna silteme jasap.
Buǵan deıin qaıǵyly oqıǵanyń 92 qurbany týraly habarlanǵan bolatyn. Qazirgi ýaqytta marqumdardyń denelerin anyqtaý jumystary júrip jatyr. Provıntsııanyń azamattyq qorǵanys bóliminiń málimetinshe, oqıǵa qurbandarynyń deneleri áli de tabylýy múmkin.
Irak premer-mınıstri Mustafa ál-Kazımıdiń aıtýynsha, órtke qatysty tergeýdiń aldyn ala nátıjeleri bir apta ishinde belgili bolady. Sonymen qatar, Dı Kar provıntsııasynyń apellıatsııalyq soty 13 densaýlyq saqtaý salasynyń 13 qyzmetkerin qamaýǵa alýǵa sanktsııa berdi.
Órt dúısenbige qaraǵan túni ottegi ballonynyń jarylysy saldarynan oryn aldy. Oqıǵaǵa baılanysty Saddam at-Tavıl provıntsııasynyń densaýlyq saqtaý mınıstri qyzmetinen ketý ýtýraly ótinish jazdy. Óz kezeginde Irak premer-mınıstri ál-Kazımı qaıǵyly jaǵdaıdyń sebepteri men barlyq jaǵdaılaryn tergeý úshin arnaıy komıssııa qurýdy tapsyryp, elde qurban bolǵandarǵa aza tutý kúnin jarııalady.
