Irakta qaýipsizdik sharalaryna baılanysty birqatar shekara beketi jabyldy
ASTANA. KAZINFORM — Irak bıligi ákimshilik sharalar men qaýipsizdikti qamtamasyz etý maqsatynda birqatar shekara ótkizý beketin ýaqytsha jaýyp tastady, dep habarlaıdy Anadoly.
Iraktyń Qaýipsizdik jáne BAQ máseleleri jónindegi basqarmasynyń jazbasha málimdemesinde ataýy kórsetilmegen birneshe shekara beketine qatysty anyqtalǵan zań buzýshylyqtar men zańsyz áreketterdi tergeý úshin qajetti quqyqtyq rásimder bastalǵany aıtylǵan.
Shekara mańyndaǵy aýdandarda barlaý jumystary kúsheıtilip, tergeý men tekserýler jalǵasyp jatyr.
Júrgizilip jatqan sharalarǵa baılanysty keıbir shekara ótkizý beketi jabyldy. Sonymen qatar «Zýrbatııa» jáne Mýnzırııa ótkizý beketteri jolaýshylardy ótkizý úshin ashyq kúıinde qalyp otyr.
Al Iraktyń buqaralyq aqparat quraldarynyń habarlaýynsha, jabylǵan beketterdiń qatarynda Iranmen shekaradaǵy birneshe ótkizý pýnkti, sonyń ishinde «Shalamche» beketi de bar.
Budan buryn Tegeran teńiz qatynasyna qoıylǵan shekteýler saqtalyp otyrǵan tusta Iraktyń birqatar munaı tankerine Ormýz buǵazy arqyly ótýge arnaıy ruqsat bergenin jazǵanbyz.
