Irakta eldiń vıtse-prezıdenti tutqyndaldy
ASTANA. 20 jeltoqsan. QazAqparat - Iraktyń sot bıligi eldiń vıtse-mınıstri Tarık Hashemıdi lańkestik qyzmetke qatysy bar degen kúdikpen tutqyndaýǵa order berdi.
Bı-Bı-Sı agenttiginiń habarlaýynsha, T.Hashemı Baǵdad áýejaıynda ustaldy, onyń úsh kúzetshisi tutqynǵa alyndy. Irak arnaıy qyzmetiniń málmetterine qaraǵanda, vıtse-prezıdenttiń kúzetshileri birqatar lańkestik shabýyldardy josparlaǵan, al T.Hashemıdiń ózi olarǵa qarjylyq qoldaý kórsetken.
Ustaý men tutqyndaý ırak basshylyǵynda jalǵasyp jatqan vıtse-prezıdent múshesi bolyp tabylatyn «Ál-Irakııa» súnnıttik partııasy men úkimet basshysy shıit Nurı Málıkıdiń arasyndaǵy janjal jaǵdaıynda bolyp otyr. «Ál-Irakııa» premerdi eldegi bılikti basyp aldy dep aıyptaýda.
Ótken jeksenbi kúni, 16 jeltoqsanda premer N.Malıkı el parlamentine óziniń orynbasary - T.Hashemıdiń partııalasy - Saleh Mýtlakty jumysynan bosatý týraly usynys túsirdi. Ol osynyń aldynda teleefırde premerdi «Saddam Hýseınnen de asqan dıktator» dep ataǵan. S.Mýtlaktyń otstavkasyn depýtattar qańtar aıynyń basynda qaramaq.
Esterińizge sala keteıik, 18 jeltoqsanda Iraktan sońǵy amerıkan sarbazdary shyqty. Sarapshylar amerıkandyq áskerlerdiń Iraktan ketýi onsyz da ýshyǵyp turǵan shıitter men súnnıtter arasyndaǵy janjal dinı zombylyqty kúsheıtýi múmkin dep qaýiptenedi.
