Irakta bir aıda lańkesterdiń qolynan 535 adam qaza tapty
ASTANA. Tamyzdyń 2-si. QazAqparat - Resmı statıstıkaǵa sáıkes, ótken shilde aıynda Irakta lańkesterdiń qolynan 535 adam qaza taýyp,
1 myńǵa jýyq adam zardap shekken. Osylaısha, ótken aı Iraktyń sońǵy eki jyl tarıhyndaǵy eń qandy aı bolyp otyr, dep habarlaıdy RBK agenttigi.
Zorlyq-zombylyqtar men lańkestik áreketter, aǵymdaǵy jyldyń naýryz aıynda ótken parlamenttik saılaýdan keıin tym jıilep ketti. Saılaýdyń qorytyndysy boıynsha birde-bir partııa mınıstrler kabınetin jasaqtaýǵa qajetti daýys jınaı ala almaǵan bolatyn. Sóıtip, el úkimeti áli kúnge deıin jasaqtalmaı otyr.
Qazirgi tańda premerlik úshin «Ál-Irakııa» súnnıtter blogynyń basshysy, burynǵy úkimet basshysy Aııad Allaýı men shııtterdiń jetekshisi jáne eldiń qazirgi úkimet basshysy Nýrı ál-Malıkı talasýda. Iraktyń úkimet basshysy týraly másele qyrkúıek aıynyń ortasyna qaraı sheshilip qalady, deıdi sarapshylar.
Al shııtter men súnnıtterdiń arasyndaǵy teketires parlament zalynan qala kóshelerine aýysyp otyr. Ótken aptada bolǵan eki jarylys 19 shııttiń ómirin qıǵan bolatyn. Bul lańkestik áreketter súnnıttik toptar tapapynan jasaldy dep aıyptalyp otyr.
Elde oryn alyp jatqan jaǵdaı amerıkan áskeriniń elden shyǵarylý protsesin kesheýildetýi múmkin, deıdi sarapshylar. Amerıkan áskerin elden áketý úderisi tamyz aıynan bastalyp, 2011 jyldyń sońyna qaraı aıaqtalýy kerek bolatyn.
