Irakta «Ál-Kaıdanyń» áskerı kóshbasshysy tutqyndaldy
ASTANA. 18 mamyr. QazAqparat - Irak áskerıleri sársenbige qaraǵan túni Iraktaǵy «Ál-Kaıda» halyqaralyq lańkestik uıymynyń áskerı basshysy bolýy múmkin degen adamdy tutqyndady,
dep habarlady Qorǵanys mınıstrliginiń resmı ókili, general Mohammed ál-Askarıge (Mohamed al-Askari) silteme jasaǵan Frans Press.
Abý Radýan (Abou Radouane) degen laqap aty bar Mehlef Mohammed Hýseın ál-Azzaýıdi (Mekhlef Mohamed Hussein al-Azzaoui) tutqyndaý operatsııasy Baǵdadtyń soltústiginde ornalasqan Samarra qalasy aýdanynda júrgizildi. Onymen qatar «Ál-Kaıdanyń» úsh joǵary laýazymdy múshesi de tutqynǵa alyndy.
Ustalǵandardyń ishinde - 29 naýryzda Tıkrıt qalasyndaǵy lańkestik úshin izdeýde júrgen Kassem Mohamed Taha (Qassem Mohamed Taha) da bar. Bul lańkestik áreket saldarynan 58 adam qaza tapqan edi.
