Irakta AQSh-tyń Vıktorııa áýe bazasyna drondar shabýyl jasady

ASTANA. KAZINFORM – Iranshyl top shabýyl úshin jaýapkershilikti óz moınyna aldy, dep habarlaıdy Kazinform-nyń Ammandaǵy menshikti tilshisi. 

Baǵdat halyqaralyq áýejaıy aýmaǵynda ornalasqan amerıkalyq Vıktorııa áýe bazasyna eki ushqyshsyz ushý apparaty shabýyl jasady. Bul týraly Iraktyń Al-Sumaria jáne Al-Rasheed telearnalary qaýipsizdik derekkózderine silteme jasaı otyryp habarlady.

Olardyń málimetinshe, bir drondy bazanyń áýe qorǵanysy kúshteri qaǵyp alǵan, al ekinshisi arnaıy operatsııalar aımaǵy mańyndaǵy perımetrdiń ishinde qulady. Habarlanǵandaı, nysandardyń biri bazadaǵy logıstıkalyq ortalyq bolǵan. Zardap shekkender nemese zalal týraly aqparat resmı túrde rastalǵan joq. 

Keıin «Iraktaǵy ıslamdyq qarsylasý» tobynyń quramyna kiretin ıraktyq «Saraıa Aýlııa ad-Dam» toby shabýyldy júzege asyrǵanyn málimdedi. Taratylǵan málimdemede bul shabýyl Irannyń Joǵarǵy kósemi Álı Hameneıdiń óltirilýine jaýap retinde atalǵan.

Jarııalanym paıda bolǵan kezde AQSh nemese Irak bıliginen eshqandaı resmı túsinikteme túsken joq. 

Aldyńǵy kúni, jeksenbide osy top Iraktyń soltústigindegi Erbıldegi amerıkalyq bazaǵa shabýyl jasaǵanyn málimdegen edi. Bul oqıǵalar aımaqtaǵy qaqtyǵystyń kúsheıýi jáne Iraktaǵy amerıkalyq áskerı kúshterdiń qatysýyna baılanysty shıelenistiń artýy aıasynda oryn alyp otyr. 

Osyǵan deıin Iraktaǵy áskerı baza shabýylǵa ushyraǵanyn habarladyq.