Irak túrmesinen 6 adamdy Qazaqstanǵa qaıtarý isinde ilgerileý bar ma

ASTANA. KAZINFORM – Irak túrmesinde otyrǵan Qazaqstan azamattaryn qaıtarýǵa qatysty kelissóz júrip jatyr. Bul týraly Bas prokýrordyń orynbasary Ǵalymjan Qoıgeldıev málim etti.

- Qazaqstannyń 6 azamaty (áıelder) jazasyn Iraktyń túrmesinde ótep jatyr. QR Syrtqy ister mınıstrligi bul máselemen aınalysyp jatyr. Bas prokýratýra da kelissózdi jalǵastyryp jatyr. Máselen, búgin Senattyń otyrysynda Kıprmen arada sottalǵan adamdardy berý týraly qujat maquldandy. Týra osyndaı kelisimsharttyń jobasyn Irak jaǵyna da joldadyq. Qazir olar osy jobany qarastyryp jatyr. Sonymen qatar biz birneshe ret Irakqa tıisti hattardy jiberdik. Internet arqyly olarmen osy kelisim jobasy boıynsha talqylaýdy usyndyq, - dedi Ǵ.Qoıgeldıev Senatta tilshiler suraǵyna jaýap bere otyryp.

Onyń aıtýynsha, qazirgi ýaqytqa deıin Irak jaǵy eshqandaı maǵlumat bermegen.

- Eger aldaǵy ýaqytta osy qujatqa qol qoısaq, Irak úkimeti aldynda atalǵan máseleni kóteremiz, - dedi Bas prokýrordyń orynbasary.

Budan buryn habarlanǵandaı, búgin Senattyń jalpy otyrysynda «Qazaqstan Respýblıkasy men Kıpr Respýblıkasy arasyndaǵy sottalǵan adamdardy berý týraly kelisimdi ratıfıkatsııalaý týraly» Zań maquldandy.