Irak túrmesindegi qazaqstandyq áıelderdi qaıtarýǵa ne kedergi – SІM jaýaby
ASTANA. KAZINFORM — Májilistiń jalpy otyrysynan keıin BAQ ókilderi Syrtqy ister mınıstriniń birinshi orynbasary Aqan Rahmetýllınnen Irak túrmesinde 8 jyldan beri otyrǵan qazaqstandyqtardyń taǵdyry týraly surady.
— Quqyq qorǵaýshylar men týystary bizge júgindi. Biz bul máselemen 8 jyl boıy aınalyspadyq dep aıta almaımyn. Sebebi olardyń sol jerde otyrǵanyn jaqynda ǵana bildik. Birinshiden, segiz adamnyń barlyǵy Qazaqstan azamaty ekeni naqty rastalǵan joq. Ártúrli málimetter bar, bir derekkózde eki adam Qazaqstannyń azamaty, qalǵandary kórshiles elderdiń azamattary ekeni aıtylǵan. Basty problema olardyń sot sheshimi boıynsha ómir boıyna bas bostandyǵynan aıyrylǵanynda. Ózderińiz bilesizder, sot bıligine aralasýǵa bolmaıdy. Qazaqstan sot sheshimine yqpal ete almaıdy. Degenmen, biz Irak tarapymen olardy qaıtarý, readmıssııa jáne basqa da kelisimder boıynsha jumys júrgizip jatyrmyz, — dedi Aqan Rahmetýllın baspasóz máslıhatynda.
Mınıstr orynbasarynyń málimdeýinshe, atalǵan máseleni sheshý, óte uzaq protsess.
— Sondyqtan biz Irak tarapymen belsendi túrde jumys istep jatyrmyz. Qazir naqty qashan jáne qandaı sharalar qolǵa alynatynyn dóp basyp aıta almaımyn. Úmit bar, qazir eki jaǵdaı bolyp tur. Birinshisi, olar Irak sotynyń sheshimimen terrorızmge járdemdeskeni úshin ómir boıyna bas bostandyǵynan aıyrylǵan. Sot sheshimine yqpal etý, óte qıyn másele. Ekinshisi, biz eger kelisim jasaı alsaq, áıelderdi Qazaqstanǵa jetkizip, jazasyn elimizde óteýine múmkindik jasaýǵa bolady. Biraq, tek Qazaqstan azamattary bolsa ǵana, — deıdi ol.
Eske sala ketsek, 2019 jyly Memleket basshysy Qasym-Jomart Toqaevtyń tapsyrmasy boıynsha júzege asyrylǵan gýmanıtarlyq aktsııa nátıjesinde Irak túrmesinde óz analarynyń janynda jatqan 14 qazaqstandyq bala qaıtaryldy.
2023 jyly elimizdiń Syrtqy ister mınıstrligi Irakta sottalǵan Qazaqstan azamattaryna qatysty kelissóz jalǵasatynyn málimdedi.
Sondaı-aq elimizdiń Syrtqy ister mınıstrligi Irak túrmesinde otyrǵan qazaqstandyq áıelderdiń jaǵdaıy týraly aıtty.