Irak túrmesindegi 6 áıeldi Qazaqstanǵa qaıtarýǵa ne kedergi

ASTANA. KAZINFORM – Syrtqy ister mınıstriniń birinshi orynbasary Aqan Rahmetýllın Iraktyń túrmesindegi Qazaqstannyń 6 azamatyn (áıelder) qaıtarý protsesine qatysty túsinik berdi. 

- Bul jaǵdaı kúrdeli, sebebi Irakpen arada ózara quqyqtyq kómek jáne sottalǵandardy berý týraly kelisim bekitilmegen. Bul qujat jobasy qazir áli de pysyqtalyp jatyr. Biz tıisti jobany ázirlep, Irak jaǵyna joldadyq. Olar ony qarastyryp otyr, - dedi A.Rahmetýllın Parlament Májilisinde tilshiler suraǵyna jaýap bere otyryp.

Onyń aıtýynsha, Irakta terrorzım boıynsha aıyptalǵan adamdar nemese lańkestikke kómekteskender ómir boıynsha bas bostandyǵynan aıyrylady.

- Sondyqtan Irak jaǵymen jumysty jalǵastyryp jatyrmyz. Sottalǵandardy berý týraly qujattyń bolmaýynan olardy qaıtarý protsesi baıaý júrip otyr, - dedi mınıstriniń birinshi orynbasary.

Eske salsaq, bıyl sáýir aıynda Bas prokýrordyń orynbasary Ǵalymjan Qoıgeldıev Irak túrmesinde otyrǵan Qazaqstan azamattaryn qaıtarýǵa qatysty kelissóz júrip jatqanyn aıtty.