Irak sońǵy 30 jylda alǵash ret munaı óndirisiniń rekordtyq deńgeıine jetti
ASTANA. 6 naýryz. QazAqparat - Irakta 30 jylda alǵash ret munaı óndirisi táýligine 3 mıllıon barrelge jetti, dep habarlady ITAR-TASS. Munaı ónerkásibi mınıstrliginiń málimetterine qaraǵanda, 1979 jyly osyndaı eń joǵary mejege qol jetkizilgen bolatyn.
Sońǵy jyldary respýblıkada «qara altyn» óndirisiniń turaqty ósimi tirkeldi. 2011 jyldyń qorytyndysy boıynsha, Irakta ortasha eseppen táýligine 2,7 mıllıon barrelden sál az shıkizat óndirilgen.
Óndiristik kórsetkishterdiń arta túsýi munaı shıkizatynyń eksportyna da oń áser etetin bolady. Onyń ústine EO men AQSh Iran munaıyna sanktsııa engizgen tusta bul asa mańyzdy bolmaq.
Atap óterligi, 2012 jlǵy qańtarda Irak táýligine 2,1 mln. barrel munaı eksporttady. Ótken jyly Iraktan munaı satyp alýshylar qatarynda Italııa, Ulybrıtanııa, Koreıa, AQSh, Qytaı jáne basqa da elderde ornalasqan kompanııalar boldy.
Eldegi munaı óndirisi úsh jyldyń ishinde eki ese artatyn bolady, dep málimdedi Iraktyń munaı ónerkásibi mınıstri Abdýl-Karım Lýaıbı. Al uzaqmerzimdi maqsatty kórsetkish táýligine ony 12 mln. barrelge jetkizý bolmaq.
