Irak Sırııamen aradaǵy shekarada qaýipsizdikti kúsheıtti

ASTANA. KAZINFORM – Irak jaǵy Sırııamen shekaradaǵy qaýipsizdik is-qımyldaryn kúsheıtti. Bul týraly Irak shekara áskerleriniń qolbasshysy general Mýhammad Abdýlvahab ál-Sýaıdı málimdedi, dep habarlaıdy Anadolu agenttigi.

Onyń aıtýynsha, Irak áskerıleri Sırııadaǵy oqıǵalarǵa baılanysty shekaradaǵy qaýipsizdikke erekshe nazar aýdaryp otyr.

Bul turǵyda general qazir shekaranyń qaýipsizdigi tolyqtaı qamtamasyz etilgenin atap ótti. 

«Biz Sırııamen aradaǵy shekarany jaqsy daıarlyqtan ótken áskerılermen kúsheıttik», - dep naqtylady ol.

Eske salsaq, buǵan deıin sırııalyq kóterilisshiler Alepponyń ortalyq aýdandaryna jetkeni habarlandy.

Sonymen qatar Sırııa armııasy Idlıbtiń ońtústigindegi sodyrlarǵa zymyranmen shabýyl jasaǵan bolatyn.