Irak Saýd Arabııasyna jasalǵan dron shabýylyna qatysty tergeýdi bastady
ASTANA. KAZINFORM — Irak bıligi Saýd Arabııasynyń respýblıka aýmaǵynan ushqyshsyz ushý apparattary ushyrylǵany týraly málimdemesinen keıin oqıǵaǵa baılanysty tergeý jumystaryn bastady. Bul týraly Kazinform agenttiginiń Taıaý Shyǵystaǵy menshikti tilshisi habarlady.
Irak premer-mınıstri Alı áz-Zaıdı eldiń kúshtik qurylymdaryna Saýd Arabııasynyń Shyǵys provıntsııasy men Er-Rııad mańyndaǵy munaı nysandaryna baǵyttalǵan drondar Irak aýmaǵynan ushyrylǵany jónindegi málimdemeni jan-jaqty tekserýdi tapsyrdy.
Bul týraly seısenbi kúni Irak úkimetiniń resmı ókili Sabah án-Nýman málimdedi.
Onyń aıtýynsha, quzyrly organdar qolda bar aqparat pen dálelderdi zerdelep jatyr. Eger shabýylǵa qatysy bar adamdar anyqtalsa, olarǵa zań aıasynda tıisti sharalar qoldanylady.
— Irak úkimeti kórshi memlekettermen tatý qarym-qatynas qaǵıdatyna adal ekenin jáne el aýmaǵynyń baýyrlas ári dostas memleketterge qarsy shabýyl jasaý úshin paıdalanylýyna jol bermeıtinin taǵy da rastaıdy, — dedi Sabah án-Nýman.
Tergeý júrgizý úshin Qorǵanys jáne Іshki ister mınıstrlikteriniń, sondaı-aq Iraktyń barlaý qyzmetiniń ókilderinen quralǵan birlesken komıssııa quryldy. Bul týraly The New Arab basylymy habarlady.
Sonymen qatar Baǵdad Er-Rııadtan barlaý derekterin, onyń ishinde áýe túsirilimderin, tehnıkalyq málimetterdi jáne atyp túsirilgen drondardyń bólshekterin usynýdy surady.
Irak tarapy Saýd Arabııasy ókilderine de tergeý jumysyna qatysýdy usyndy. Premer-mınıstr komıssııaǵa tekserý nátıjesi qandaı bolsa da, oqıǵanyń barlyq mán-jaıyn jan-jaqty anyqtaýdy tapsyrdy.
Irak bıligi eki el arasyndaǵy qarym-qatynas ózara qurmetke, ortaq múddelerge jáne tatý kórshilik qaǵıdattaryna negizdelgenin atap ótti. Baǵdad ekijaqty baılanystar men kórshi elderdiń qaýipsizdigine nuqsan keltirýge baǵyttalǵan kez kelgen áreketke jol bermeıtinin málimdedi.
Buǵan deıin Saýd Arabııasynyń Qorǵanys mınıstrligi áýe shabýylyna qarsy qorǵanys kúshteri Shyǵys provıntsııasy men Er-Rııad mańyndaǵy munaı nysandaryna baǵyttalǵan birneshe ushqyshsyz ushý apparatyn atyp túsirgenin habarlaǵan bolatyn. Oqıǵa saldarynan zardap shekkender men materıaldyq shyǵyn tirkelmegen.
🔴 Saudi Arabia’s air defenses intercepted and destroyed drones coming from Iraq, the Kingdom’s defense ministry says in a statement
— Al Arabiya English (@AlArabiya_Eng) July 27, 2026
🔴 The drones attempted to target oil facilities in Saudi Arabia’s eastern region and Riyadh, according to the ministry
🔴 The ministry says the… pic.twitter.com/yzdXfL0y9m
Saýd Arabııasy Qorǵanys mınıstrliginiń resmı ókili Túrkı ál-Malıkı drondardyń Irak aýmaǵynan ushyrylǵanyn málimdedi. Er-Rııad bul shabýyl úshin Iran qoldaıtyn qarýly toptardy jaýapty dep sanaıtynyn aıtyp, qajet bolǵan jaǵdaıda ózine qolaıly ýaqyt pen jerde jaýap qaıtarý quqyǵyn saqtaıtynyn jetkizdi.
Óz kezeginde «Iraktaǵy ıslamdyq qarsylyq» birlestigi Saýd Arabııasynyń aıyptaýlaryn joqqa shyǵardy. Bul uıym Iran qoldaıtyn birneshe qarýly toptan quralǵanymen, resmı túrde Iraktyń memlekettik áskerı qolbasshylyǵyna baǵynbaıdy.
Birlestik ókilderi Er-Rııadtyń málimdemesin negizsiz dep atap, Saýd Arabııasyn Irakqa qarsy qandaı da bir jaýap sharalaryn qabyldamaýǵa shaqyrdy.
Oqıǵa aımaqtaǵy shıelenistiń áli de saqtalyp otyrǵan kezeńinde boldy. Sońǵy aılarda Baǵdad Iraktyń AQSh pen Iran arasyndaǵy teketireske tartylýyna jol bermeýge tyrysyp keledi. Sonymen qatar úkimet memlekettik baqylaýdan tys áreket etetin qarýly toptardyń qyzmetin shekteý mindetimen de betpe-bet kelip otyr.
Eske salaıyq, buǵan deıin Iordanııa óz áýe keńistiginde shyǵý tegi ázirge belgisiz eki ushqyshsyz ushý apparatyn atyp túsirgeni habarlanǵan bolatyn.
