Irak Saýd Arabııasy shekarasy mańynan iri munaı ken ornyn tapty
ASTANA. KAZINFORM — Irak Saýd Arabııasymen shekara mańynan iri munaı ken ornyn anyqtady. Eldiń Munaı mınıstrligi bul jańalyqty sońǵy jyldardaǵy energetıka salasyndaǵy eń mańyzdy oqıǵalardyń biri dep baǵalap otyr, dep habarlaıdy euronews.
Aldyn ala málimetterge sáıkes, Iraktyń ońtústigindegi Nadjaf provıntsııasynda ornalasqan Qurnain barlaý blogyndaǵy ken ornynda 8,8 mıllıard barrelden astam munaı qory bolýy múmkin.
Qurnain ýchaskesi Iraktyń ońtústik-batysynda, Baǵdadtan shamamen 180 shaqyrym qashyqtyqta jáne Saýd Arabııasymen shekaralas aımaqta ornalasqan. Aýmaǵy 8 773 sharshy shaqyrymdy quraıtyn bul óńir munaı barlaý jumystary úshin eń perspektıvaly aımaqtardyń biri sanalady. Ken ornyn barlaý jáne ıgerý týraly kelisimge 2024 jylǵy 17 qazanda qol qoıylǵan.
Mınıstrlik málimetinshe, Shams-11 barlaý uńǵymasynda júrgizilgen burǵylaý jumystary nátıjesinde táýligine 3 248 barrel óndirýge múmkindik beretin jeńil munaı qory anyqtalǵan.
Bul týraly Iraktyń Munaı mınıstri Haıan Abdýl Ǵanı men qytaılyq ZhenHua Oil kompanııasy ókilderiniń kezdesýinde málim boldy. Taraptar ken ornyn ıgerý barysyn talqylap, barlaý men óndirý jumystaryn jedeldetý úshin zamanaýı burǵylaý tehnologııalaryn paıdalaný máselesin qarastyrdy.
Sonymen qatar Baǵdad Basra provıntsııasynan Sırııa shekarasyna jaqyn ornalasqan Hadıta qalasyna deıin tartylatyn iri munaı qubyry jobasyn júzege asyrýdy jedeldetip jatyr. Qubyrdyń josparlanǵan ótkizý qýaty táýligine 2,5 mıllıon barreldi quraıdy.
AQSh Energetıkalyq aqparat basqarmasynyń (EIA) baǵalaýynsha, Irak dáleldengen munaı qory boıynsha álemde besinshi orynda tur. Eldiń munaı qory shamamen 145 mıllıard barrelge baǵalanady. Bul Taıaý Shyǵystaǵy jalpy qordyń shamamen 17%-yn jáne álemdik qordyń 8%-yn quraıdy.
Buǵan deıin Irak Ormýz buǵazyn aınalyp ótip, Sırııa arqyly munaı eksporttaı bastaǵany belgili boldy.
