Irak premer-mınıstri Ulttyq qaýipsizdik keńesiniń shuǵyl otyrysyn shaqyrdy
ASTANA. KAZINFORM – Irak bıligi qaýipsizdik calasyndaǵy jaǵdaıdyń damýyna baılanysty shuǵyl konsýltatsııalar ótkizip jatyr, dep habarlaıdy Kazinform agenttiginiń Taıaý Shyǵystaǵy menshikti tilshisi.
Irak premer-mınıstri Álı az-Zaıdı sársenbi kúni tańerteń elge jasalǵan áýe shabýyldarynan keıin Ulttyq qaýipsizdik mınıstrleri keńesiniń shuǵyl otyrysyn ótkizýdi tapsyrdy. Bul týraly Irak qaýipsizdik baspasóz qyzmetine silteme jasap Iraktyń INA aqparattyq agenttigi habarlady.
Málimdemede kezdesýden keıin bılik organdarynyń oqıǵalar men qabyldanǵan sheshimder týraly egjeı-tegjeıli esep jarııalaıtyny atap ótildi.
Eske salsaq, sársenbide Saýd Arabııasynyń Qorǵanys mınıstrligi Saýd Arabııasynyń qarýly kúshteri AQSh Ortalyq qolbasshylyǵymen (CENTCOM) birlesip Iraktaǵy Iran qoldaǵan jasaq nysandaryna shabýyl jasaǵanyn habarlady.
Er-Rııad bul operatsııanyń koroldiktiń munaı ınfraqurylymyna jasalǵan dron shabýyldaryna jaýap retinde jasalǵanyn málimdedi.
Óz kezeginde Iraktyń Halyqtyq mobılızatsııa kúshteri (HMK) jeti provıntsııa – Baǵdad, Vasıt, Nınevııa, Basra, Kırkýk, Kerbala jáne Dııaladaǵy shtab-páterlerine shabýyl jasalǵanyn málimdedi.
Aldyn ala málimet boıynsha, olardyń kem degende 20 jaýyngeri qaza taýyp, taǵy 32-si jaralanǵan. Uıym shabýyldy Irak egemendigin buzý jáne «qaýipti eskalatsııa» dep atady.
Osyǵan deıin Irak bıligi Saýd Arabııasynyń respýblıka aýmaǵynan ushqyshsyz ushý apparattary ushyrylǵany týraly málimdemesinen keıin oqıǵaǵa baılanysty tergeý jumystaryn bastaǵanyn habarladyq.
