Irak premeri elordanyń qaýipsizdik kúshteriniń basshysyn qyzmetinen alyp tastady
ASTANA. Jeltoqsannyń 10-y. QazAqparat - Baǵdadtyń qaýipsizdik kúshteriniń qolbasshysy, Irak elordasynda oryn alǵan birneshe lańkestik oqıǵanyń saldarynan, sársenbi kúni qyzmetinen alyp tastalyndy. El Premer-mınıstriniń keńsesinen habarlaǵandaı,
úkimet basshysy Nýrı ál-Málıkı general-leıtenant Abýd Gambardy ornynan bosatý týraly ókim berdi. Onyń ornyna osy qyzmetke general-leıtenant Ahmed Hashem al-Ýveıda taǵaıyndaldy, dep habarlaıdy ITAR-TASS agenttigi.
Seısenbi kúni Baǵdadta bolǵan bes jarylysta 130-ǵa jýyq adam kóz jumyp, 500-deı adam jaralandy. Mına qoıylǵan kólikter birqatar mınıstrlikter men vedomstvolardyń janynda jarylǵanyn QazAqparat budan buryn habarlaǵan bolatyn. Ekstremısterdiń bul qandy áreketi Baǵdadta tamyz aıynan beri oryn alyp otyrǵan úshinshi úlken shabýyly. Buǵan deıingi eki lańkestik áreket qazannyń 25-i men tamyzdyń 19-ynda oryn alyp, 250-den astam adamnyń ómirin qıǵan bolatyn.
Gambar - Saddam Hýseın armııasynyń burynǵy generaly, ol bul qyzmetine 2007 jyldyń qańtar aıynda taǵaıyndalǵan bolatyn. General kezinde, 1991 jyly, Kýáıtti azat etý jónindegi antısaddamdyq «Shóldegi boran» operatsııasy kezinde jaıaý áskerge qolbasshylyq etken. Sol kezde tutqynǵa túsip, keıinnen Ámirlikten Irak áskeri qýylǵannan keıin, bosatylǵan. Gambar 2003 jyly amerıkan áskeri Irakqa kirmes buryn, otstavkaǵa shyqqan.
