Irak pen BUU turaqty damý salasyndaǵy yntymaqtastyq negizine qol qoıdy
ASTANA. KAZINFORM — Irak úkimeti men Birikken Ulttar Uıymy 2025-2029 jyldarǵa arnalǵan turaqty damý boıynsha yntymaqtastyqtyń jańa negizine kelisti. Bul týraly BUU Jańalyqtary habarlady.
Saltanatty rásim Irak premer-mınıstriniń orynbasary, ári josparlaý mınıstri Mohamed Alı Tamım men BUU Bas hatshysynyń eldegi arnaıy ókili Mohamed Ál-Hasannyń qatysýymen ótti. Qujatqa úkimet atynan mınıstr Tamım jáne Bas hatshynyń arnaıy ókiliniń orynbasary, BUU-nyń Iraktaǵy úılestirýshisi Gýlam Mohammad Isakzaı qol qoıdy.
BUU-nyń Irakqa kómek kórsetý mıssııasy (MOONSI) 22 jyl buryn qurylǵan. Ol bıyl 31 jeltoqsanda jumysyn aıaqtaıdy. Al 2026 jyldan bastap isti mıssııanyń eldegi komandasy jalǵastyrady.
Jańa baǵdarlama tórt negizgi baǵytty qamtıdy: halyqtyń bilim berý, densaýlyq saqtaý jáne áleýmettik qyzmetterge qoljetimdiligin arttyrý; ekonomıkalyq ósýdi yntalandyrý jáne jastardy, áıelderdi jáne «jasyl» bastamalardy qoldaýdy qosa alǵanda, jumys oryndaryn qurý; qorshaǵan ortany qorǵaý jáne klımattyń ózgerýine beıimdelý; memlekettik basqarýdy, quqyq ústemdigin jáne áleýmettik kelisimdi nyǵaıtý.
Saltanatty rásimde sóz sóılegen Tamım jańa seriktestik Iraktyń gúldengen bolashaqty qurýǵa jáne ulttyq maqsattarǵa jetý jáne 2030 jylǵa deıingi kún tártibin júzege asyrý úshin BUU-men kúsh biriktirýge degen umtylysyn kórsetetinin atap ótti.
Mohamed ál-Hasan óz sózinde kelisimge qol qoıý Irak pen BUU arasyndaǵy saıası turaqtylyqty qoldaýdan, turaqty damý salasyndaǵy uzaq merzimdi yntymaqtastyqqa kóshýdi bildiretinin aıtty. Óz kezeginde Gýlam Isakzaı bul qujat BUU-nyń Irakqa kómek kórsetý mıssııasynyń (MOONSI) mandaty aıaqtalǵannan keıin jáne gýmanıtarlyq operatsııalardy toqtatqannan soń ózara is-qımyldyń jańa taraýyn ashady dep málimdedi. Endi joǵary sapaly tehnıkalyq jáne saraptamalyq qoldaý kórsetýge basa nazar aýdarylady.
Aıta keteıik, Iran men AQSh BUU Qaýipsizdik Keńesindegi kelissózder barysynda qatań málimdemeler jasady.