Irak parlamenti saılaý týraly jańa zańdy biraýyzdan qabyldady
ASTANA. Jeltoqsannyń 7-si. QazAqparat - Irak parlamenti eldiń jańa saılaý zańnamasyn qabyldaý úshin tótenshe sessııada «biraýyzdan derlik» daýys berdi,
dep habarlady dúısenbi kúni Frans Press agenttigi el parlamentiniń spıkeri Iıad as-Samarraıdiń málimdemesine silteme jasap.
Parlamentshilerdiń daýys berýi jeksenbi kúni túnde aıaqtaldy.
Reıter agenttiginiń aqparatyna sáıkes, Irak vıtse-prezıdenti Tarık ál-Hashemı, parlamenttiń sheshimin qurmetteıtinin jáne jańa zańnyń parlamentte shetelde turatyn ıraktyqtarǵa oryn berýge qatysty taraýyna aǵymdaǵy jyly qarashanyń 18-inde salǵan «vetony alyp tastaýǵa» kelisetinin málim etip otyr.
Jańa saılaý zańnamasy boıynsha Irak parlamentindegi depýtattyq oryndar 275-ten 325-ke arttyrylady, onyń 310 orny - Iraktyń 18 provıntsııasynyń ókilderine berilse, taǵy 15 oryn - din ókilderi men az ulttardyń ókilderine berilmek.
Irak parlamenti jalpyhalyqtyq saılaý týraly jańa zańdy qarashanyń 8-inde qabyldady. Saılaý kelesi jyly qańtardyń 18-i men 23-i aralyǵynda ótedi dep josparlanǵan edi. Ál-Hashemı memleket basshysy men onyń eki orynbasarynan turatyn Prezıdenttik keńestiń quramyna kiredi. Olardyń barlyǵy zańnamalyq veto quqyǵyna ıe. Ál-Hashemı zańda shetelderde turatyn ıraktyqtar úshin parlamenttegi oryndy 5 paıyzdan 15 paıyzǵa jetkizýge talpynǵan bolatyn.
Iraktan tys jerlerde 4 mıllıonǵa jýyq el azamaty turady. Olardyń kóbisi, Ál-Hashemı sııaqty - súnnıtter, kezinde shııt-súnnıt soǵystary kezinde elden qashýǵa májbúr bolǵandar. Ál-Hashemı saılaý zańyna veto salǵannan keıin, Iraktyń Táýelsiz joǵarǵy saılaý komıssııasy 2010 jyldyń qańtar aıynyń sońyna belgilengen parlamenttik saılaýǵa ázirlikti toqtatyp edi.
Al bul jaıt óz kezeginde eldegi jaǵdaıdy ýshyqtyryp, sondaı-aq AQSh-tyń 2010 jyldyń jazyna qaraı Iraktaǵy áskerı operatsııalaryn toqtatyp, 2011 jyldyń sońyna deıin áskerin el aýmaǵynan tolyq áketý josparyna kedergi bolǵaly otyr edi.
