Irak parlamenti súnnıt depýtatty spıker etip saılady
ASTANA. KAZINFORM – Irak parlamenti beısenbi kúni súnnıttik zań shyǵarýshy Mahmud ál-Mashhadanıdi spıker etip saılap, saıası fraktsııalar arasynda uzaqqa sozylǵan kelispeýshilik saldarynan bir jyldaı bos bolǵan bul laýazymǵa qatysty máselege núkte qoıdy, dep habarlaıdy Kazinform menshikti tilshisi.
Tyǵyryqqa tiregen másele 2023 jyldyń qarasha aıynda Irak Federaldyq Joǵarǵy Sotynyń burynǵy spıkeri, Iraktyń eń bedeldi súnnıt saıasatkeri Muhammed ál-Halbýsıdiń mansabyn toqtý týraly sheshiminen keıin oryn aldy.
Mundaı sheshim ál-Halbýsıdi jalǵan qujat jasady dep aıyptaǵan parlament músheleriniń biriniń sotqa bergen aryzyn qarastyrǵannan keıin qabyldandy. Sot bul aıyptaýlardy negizdelgen dep taýyp, bul onyń ókilettikterin toqtatýǵa ákeldi. Osydan keıin Parlament spıkeri qyzmeti bir jyl boıy bos qaldy.
Biraq beısenbide 2006-2008 jyldary parlament spıkeri bolǵan Mahmud Mashhadanı yqpaldy sheıit partııalary men ıranshyl toptardyń, sondaı-aq burynǵy premer-mınıstr Nýrı ál-Malıkı basqaryp otyrǵan «Zań memleketi» koalıtsııasynyń aıtarlyqtaı qoldaýymen bul laýazymǵa qaıta saılandy.
Súnnıtterdiń kópshiligin quraıtyn «Takadým» (Іlgerileý) partııasyn basqaratyn Muhammed ál-Halbýsı sońǵy kúnderi súnnıtterdiń jetekshilerimen uzaq kelissózder júrgizdi, dep habarlaıdy Asharq al-Awsat. Habarlanǵandaı, bul talqylaýlar ál-Mashhadanıdiń kandıdatýrasy boıynsha konsensýsqa ákeldi.
Daýys berý kezinde zań shyǵarýshylar basqa kandıdattardy da qarastyrdy: Salım ál-Aısavı, Talal ál-Zýbaı jáne Amer Abdýl Djabbar. Olardyń ishinde ál-Mashhadanı daýys berýdiń ekinshi kezeńinde sheshýshi jeńiske jetip, beısenbi kúngi sessııaǵa qatysqan 269 zań shyǵarýshynyń 182 daýysyn alyp, nátıjesinde resmı túrde parlament spıkeri atandy. Irak parlamentinde barlyǵy 329 oryn bar.
Mahmud ál-Mashhadanı - Irak saıasatkeri jáne dáriger, 1948 jyly Baǵdadta dúnıege kelgen. Medıtsınalyq bilim alyp, hırýrgııaǵa mamandandy jáne Irak armııasynda dáriger retinde qyzmet etti.
Osyǵan deıin Izraıl-Lıvan shekarasyna jaqyn jerde Taılandtyń tórt azamaty mert bolǵany týraly jazdyq.
