Irak parlamenti Álı az-Zaıdı basqaratyn jańa úkimetti bekitti

Irak parlamenti beısenbi kúni premer-mınıstr Álı az-Zaıdıdiń úkimetine jáne onyń mınıstrlik baǵdarlamasyna senim bildirý týraly daýys berdi, dep habarlaıdy Iraktyń INA aqparat agenttigi.

329 músheniń 266-sy qatysqan sessııa barysynda músheler 14 mınıstrdi bekitti, sodan keıin az-Zaıdı men onyń kabınet músheleri konstıtýtsııalyq ant berdi.

Alı Basım Mohammed Hýdaır munaı mınıstri, Falıh as-Sarı qarjy mınıstri bolyp taǵaıyndaldy. Al Fýad Hýsseın syrtqy ister mınıstri qyzmetin saqtap qaldy.

Zaıdı kabınetiniń bekitilgen mınıstrleri:

1. Alı Basım Mohammed Hýdaır - Munaı mınıstri

2. Mohammed Nýrı Ahmed - Ónerkásip mınıstri

3. Álı Saad Vahıb - Elektr energetıkasy mınıstri

4. Ábdel Hýseın Azız - Densaýlyq saqtaý mınıstri

5. Sarva Ábdel Vahıd - Qorshaǵan orta mınıstri

6. Ábdel Rahım Djasım - Aýyl sharýashylyǵy mınıstri

7. Mýtanna Álı Mahdı - Sý resýrstary mınıstri

8. Mýstafa Nızar Djýma - Saýda mınıstri

9. Halıd Shaýanı - Ádilet mınıstri

10. Ábdel Karım Abtan - Bilim mınıstri

11. Vahab Salman Mohammed - Kólik mınıstri

12. Falıh ál-Sarı - Qarjy mınıstri

13. Fýad Hýseın - Syrtqy ister mınıstri

14. Mýstafa Djabbar Sanada - Baılanys mınıstri

Sonymen qatar parlament Іshki ister jáne Qorǵanys mınıstrlikteriniń basshylaryn qosa alǵanda, birqatar negizgi mınıstrlerdi áli bekitpegeni habarlandy. Saıası kúshter arasyndaǵy kelispeýshilikterge baılanysty keıbir portfolıolar boıynsha daýys berý keıinge qaldyryldy.

Irak BAQ-tarynyń habarlaýynsha, keıbir mınıstrlikter kandıdattar naqtylanǵanǵa deıin ýaqytsha premer-mınıstrdiń baqylaýynda bolady.

Úkimet maquldaǵannan keıingi alǵashqy sózinde Zaıdı óz kabınetiniń sybaılas jemqorlyqpen kúresýge, ekonomıkalyq reformaǵa jáne memlekettik ınstıtýttardy nyǵaıtýǵa nazar aýdaratynyn málimdedi.

- Reformaǵa baratyn jol ishten bastalady - sybaılas jemqorlyq pen ákimshilik tıimsizdikpen kúresý arqyly, - dep málimdedi premer-mınıstr.

Onyń aıtýynsha, úkimet ekonomıkalyq ártaraptandyrýdy, ınvestıtsııalardy damytýdy jáne eldiń qarjy júıesin nyǵaıtýdy kózdeıdi.

Zaıdı sonymen qatar «memleket qolyndaǵy qarýdy shekteý», qaýipsizdik júıesin reformalaý jáne azamattardyń demokratııalyq ınstıtýttarǵa degen senimin nyǵaıtý qajettiligi týraly aıtty. Sonymen qatar premer-mınıstr sheteldik dıplomatııalyq mıssııalardy Baǵdadtaǵy tolyq jumysqa oralýǵa shaqyrdy.

Jańa úkimet 2003 jyly AQSh-tyń basyp kirýinen bergi Irakta qurylǵan toǵyzynshy kabınet boldy.

Saıasatqa bıznes jáne bank sektorynan kelgen az-Zaıdı shııt, sýnnıt jáne kúrd saıası kúshteriniń qoldaýyna ıe bolǵan ymyraǵa kelýshi tulǵa bolyp sanalady.

Úkimettiń qurylýy arab BAQ-tarynyń habarlaýynsha, AQSh-tyń qysymy aıasynda ótti. Ol Irandy jaqtaıtyn qarýly toptardyń ókilderiniń kabınetke tikeleı qatysýyna qarsy boldy.

Osyǵan qaramastan, negizgi shııt kúshteri men qarýly toptardyń ókilderi jańa úkimet bekitilgen parlamenttik sessııaǵa qatysty.

Esterińizge sala keteıik, 27 sáýirde Álı az-Zaıdı birneshe aılyq saıası tyǵyryqqa tirelgennen keıin shııt saıası blogy tarapynan premer-mınıstr laýazymyna ymyraǵa kelýshi tulǵa retinde usynyldy. Sonymen qatar sáýir aıynda Irak parlamenti Nızar Amıdıdi prezıdent etip saılady. Keıinirek Qasym-Jomart Toqaev ony saılanýymen quttyqtady.