Irak Pákistanda oqyp jatqan áskerı qyzmetkerlerin elge qaıtardy

ASTANA. KAZINFORM — Irak premer-mınıstri Muhammed Shııa as-Sýdanı Pákistanda oqýdan ótip jatqan 500 ıraktyq áskerı qyzmetkerdi, onyń ishinde ofıtserlerdi elge qaıtarý týraly buıryq berdi, dep habarlaıdy Anadoly.

Resmı Irak aqparat agenttigi INA habarlaǵandaı, bul sheshim Pákistan men Úndistan arasyndaǵy áskerı shıelenistiń kúsheıýi aıasynda qabyldanǵan.

Málimetke sáıkes, Irakqa oralǵannan keıin áskerı qyzmetkerler eldiń qazirgi qajettilikterine saı qaıta ornalastyrylady jáne qyzmetke tartylady.

Qaqtyǵystyń ýshyǵýy: Úndistannyń zymyrandyq soqqylary

2025 jylǵy 6 mamyrda Úndistan Pákistan aýmaǵyna, sonyń ishinde Pákistan baqylaýyndaǵy Azad Kashmır aımaǵyna zymyrandyq soqqylar jasady. Bul shabýyl 22 sáýirde Úndistannyń Pahalgam aýdanynda oryn alǵan lańkestik áreketke jaýap retinde jasaldy, onda 26 adam qaza tapqan edi.

Úndistan tarapynyń málimetinshe, toǵyz nysana dál tıgen, olardyń bári «lańkestik obektiler» retinde sıpattalǵan.

Alaıda Pákistan bıligi soqqylar alty beıbit nysanǵa jasalǵanyn, sonyń saldarynan 33 adamnyń, onyń ishinde bir balanyń qaza taýyp, taǵy 62 adamnyń jaralanǵanyn málimdedi.

Pákistan armııasy shabýyl kezinde bes úndi joıǵysh ushaǵyn atyp túsirgenin habarlady, biraq bul aqparatty Nıý-Delı joqqa shyǵardy.

Úndistan premer-mınıstri Narendra Modı mınıstrler kabınetiniń otyrysynda bul áskerı soqqylardy «Sındýr operatsııasy» dep atap, ony «maqtanysh sáti» dep sıpattady. «Sındýr» sózi hındı tilindegi sózdikterge sáıkes, ındýıst áıelder mańdaıyna jaǵatyn qyzyl untaqty bildiredi.

Jaýap retinde Pákistan premer-mınıstri Shahbaz Sharıf halyqqa úndeý jasap, lańkestik áreketterdiń saldary úshin Úndistan jaýap beretinin, Pákistan qaza tapqandar úshin kek alatynyn málimdedi.

Aıta ketelik Tramp Úndistan men Pákistan bitimge kelgeni týraly habarlaǵan edi.