Irak Izraıl shabýyldarynan qashqan lıvandyqtarǵa tegin vıza beredi

ASTANA. KAZINFORM – Irak premer-mınıstri jáne Qarýly kúshterdiń bas qolbasshysy Muhammed ál-Sýdanı Lıvandaǵy qıyn jaǵdaıǵa baılanysty elge kelgen lıvandyqtarǵa tegin kirý vızasyn berýdi buıyrdy. Bul týraly INA habarlady.

– Lıvanda jalǵasyp jatqan soǵysqa baılanysty Lıvan azamattarynyń Irakta bolatyn otyz kúndik vıza merzimin uzartý kerek. Elde bolý merzimine baılanysty zańdy buzǵan Lıvan azamattary jazadan bosatylýy kerek. Vıza merzimi aıaqtalǵannan keıin Irakpen shekaralas pýnktterge kelgen Lıvan azamattaryna tegin kirý vızalaryn berýdi jalǵastyrsyn, – delingen Premer-Mınıstrdiń buıryǵynda.

24 qyrkúıek kúni tústen keıin Izraıl Beırýtke kezekti áýe shabýylyn jasady. 560-qa jýyq adam qaıtys boldy.

«The Times of Israel» ınternet-basylymynyń áskerı ortadaǵy derekkózderge silteme jasap habarlaýynsha, Izraıl qorǵanys armııasynyń (TsAHAL) Beırýtke jasaǵan shabýylyndaǵy kózdegen nysanasy «Hezbolla» zymyrandyq bólimshesiniń komandıri bolǵan. Onyń taǵdyry áli belgisiz.

Izraıl tankteri men artıllerııasy Lıvan shekarasyna jaqyn mańdaǵy nysandardy da atqylady, dep habarlady AP. Izraıldiń áýe shabýyldarynan ońtústik Lıvannyń 1700 sharshy shaqyrym aýdany zardap shekken.

Izraıl úkimeti kem degende 30 qyrkúıekke deıin sozylatyn búkil elde tótenshe jaǵdaı engizdi. «Hezbolla» óz tarapynan qyrkúıektiń 24-ine qaraǵan túni jáne sol kúni tańerteń Izraıldegi segiz nysanǵa, sonyń ishinde Lıvanmen shekaradan 60 shaqyrym jerde ornalasqan Zıhron ıAkov qalasyndaǵy jarylǵysh zat zaýytyna shabýyl jasaǵanyn habarlady.