Irak Iranmen shekaradaǵy úsh ótkizý beketin qaıta ashyp jatyr
ASTANA. KAZINFORM — Irak bıligi Iranmen shekarada ýaqytsha jabylǵan ótkizý beketteriniń jumysyn qaıta jandandyrý tártibin belgiledi. Bul týraly Kazinform agenttiginiń menshikti tilshisi habarlaıdy.
Irak 13 qyrkúıekten bastap Iranmen shekarada ornalasqan Sheıb, Shalamche jáne Mandalı baqylaý-ótkizý pýnktteri arqyly jolaýshylar men saýda tasymalyn kezeń-kezeńimen qalpyna keltire bastady. Bul sheshim premer-mınıstr Álı áz-Zeıdıdiń ókimimen qabyldanǵanyn Irak qaýipsizdik kúshteriniń aqparattyq bólimi málimdedi.
Eki ótkizý beketinde jolaýshylar qatynasy qaıta jandandy. Al úsh ótkizý beketindegi saýda qatynasy 17 qyrkúıekke deıin kezeń-kezeńimen qalpyna keltiriledi.
Bul sheshim shekaradaǵy ahýal, tehnıkalyq júıeler men baqylaý-ótkizý pýnktteriniń jumys tártibi tekserilgennen keıin qabyldandy. Irak bıliginiń málimdeýinshe, mundaı sharalar shekara qaýipsizdigin kúsheıtip, azamattar men júktiń kedergisiz ótýin qamtamasyz etýge baǵyttalǵan.
Buǵan ne sebep?
Irak 12 qyrkúıekte ákimshilik jáne uıymdastyrý jumystaryn júrgizip, qaýipsizdikke qatysty zań buzýdy tergeý úshin ótkizý beketterin ýaqytsha japqan bolatyn.
Bul oqıǵa Baǵdadtyń Saýd Arabııasyndaǵy nysandarǵa jasalǵan soqqylardyń Iraktyń Maısan provıntsııasynan bastaý alǵanyn rastaǵannan keıin týyndady.
Eske sala keteıik, Saýd Arabııasynyń Syrtqy ister mınıstrligi buǵan deıin «Shyǵys — Batys» munaı qubyryna shabýyl jasaǵan birneshe dron Irak aýmaǵynan ushyrylǵanyn habarlaǵan.
Soqqynyń saldarynan munaı qubyry zaqymdanyp, birneshe adam zardap shekti. Er-Rııad Irak úkimeti basshysynyń ótinishi boıynsha ázirge qarymta soqqy bermeı otyrǵanyn málimdedi.
#Statement | The Foreign Ministry expresses the Kingdom of Saudi Arabia’s strongest condemnation of targetting the East-West Pipeline in the Riyadh and Madinah regions by several drones launched from Iraq, which resulted in injuries and some damage that is currently being recovered.
— Foreign Ministry 🇸🇦 (@KSAmofaEN) September 11, 2026
Irak oqıǵanyń mán-jaıyn anyqtap jatyr
Osy oqıǵadan keıin Irak premer-mınıstri Maısandaǵy qaýipsizdik kúshteriniń qolbasshysy men óńir polıtsııasy basshysyn qyzmetinen bosatý týraly sheshim qabyldady. Sondaı-aq jergilikti quqyq qorǵaý organdarynyń basshylaryna qatysty tergeý júrgizýdi tapsyrdy.
🔴 Iraq has dismissed commander of Maysan Operations Command in wake of attacks on Saudi Arabia 📍Prime Minister Ali Al-Zaidi also orders investigation into Maysan Operations Command after attacks on Saudi Arabia were traced to site in province https://t.co/7xzoglpu8P https://t.co/FZau82crGe
— Anadolu English (@anadoluagency) September 12, 2026
Baǵdad shekara ótkelderiniń ýaqytsha jabylýyn jedel jaǵdaıdy, tehnıkalyq júıelerdi jáne shekaradaǵy qaýipsizdikti qamtamasyz etý tártibin tekserýmen baılanystyrdy.
Sonymen birge Iraktyń Shafaq News agenttigi derekkózge silteme jasap, shekara ótkelderiniń jabylýy Tegeranǵa ekonomıkalyq qysym jasaý maqsatynda qolǵa alynǵanyn habarlady. Derekkózdiń málimetinshe, Irannan Irakqa materıaldar, qarý-jaraq jáne drondar óndirýge arnalǵan jabdyqtar jetkizilip, keıin olardy qarýly toptar Saýd Arabııasyna shabýyl jasaý úshin paıdalanǵan. Bul aqparat resmı túrde rastalǵan joq.
Iran qoldaıtyn qarýly toptardy biriktiretin «Irak ıslam qarsylyǵy» uıymy shabýylǵa qatysy baryn joqqa shyǵaryp, tergeýge kómektesýge daıyn ekenin málimdedi. Ázirge shabýylǵa jaýapkershilikti eshkim óz moınyna alǵan joq.
Iran Syrtqy ister mınıstrligi 14 qyrkúıekte Tegerannyń shabýylǵa qatysy bar degen aıyptaýlardy jalǵan dep baǵalady. Buǵan deıin Iran tarapy Iran–Irak shekarasyna jaqyn jerden anyqtalǵan drondardy ushyrý alańdaryna qatysty birlesken tergeý júrgizýdi usynǵan bolatyn. Irak premer-mınıstri bul bastamany qoldady.
Bul rette eki el arasyndaǵy shekara tolyq jabylǵan joq. Osy kúnderi taǵy eki ótkizý beketi jolaýshylar men kommertsııalyq júkterdi táýlik boıy ótkizip otyrdy.
Buǵan deıin Irakta qaýipsizdik sharalaryna baılanysty birqatar shekara beketi jabylǵany habarlanǵan bolatyn.
Aqzat Jıenalına
