Irak Elekeev Astanany salǵan qurylysshylarǵa eskertkish ornatýdy usyndy

ASTANA. KAZINFORM – Astana qalasy Qoǵamdyq keńesiniń múshesi, qalalyq kásipkerlerdiń quqyqtaryn qorǵaý jáne sybaılas jemqorlyqqa qarsy is-qımyl jónindegi keńesiniń tóraǵasy Irak Elekeev Astana salǵan qurylysshylarǵa arnap eskertkish salýdy usyndy.

- Aramyzda ishki saıasat basqarmasynyń ókilderi otyr eken. Astanany salǵan qurylysshylar. Astanany salamyz dep júrip ólgen de, jaraqat alǵan da solar. Biz solardyń eńbegin durystap baǵaladyq pa ?

Astana aýmaǵynda qurylysshylarǵa arnalǵan bir eskertkish bar ma osy, aıtyńyzdarshy maǵan ? Astanany qaltalylar emes, qurylysshylar salǵan, - dedi Irak Elekeev qoǵamdyq keńes otyrysynda.

Qoǵamdyq keńes múshesi Jumysshy mamandyqtar jylynda osy olqylyqtyń ornyn toltyrý kerek degen oı aıtty.

- Biz sovet úkimetin jamandaımyz. Al ol kezde úzdik sylaqshylar, montaj mamandary búkil odaqqa tanymal bolatyn. Al qazir bizde qaltasyn toltyryp alǵandar tanymal. Osy jaǵyna nege mán bermeımiz. Astanany salǵan qurylysshylarǵa durystap bir jaqsy eskertkish qoısa durys bolar edi. Osyndaı usynysym bar, - dedi zańger.

Eske salsaq, 2025 jyl Jumysshy mamandyqtarynyń jyly bolyp bekitilgen edi.