Irak astanasynda eki jarylys bolyp, kem degende 23 adam mert boldy
BAǴDAT. QazAqparat – Irak ishki ister mınıstrliginiń málimetine sensek, beısenbi kúni el astanasynda eki jankeshti lańkes jarylys jasap, saldarynan 23-ten astam adam mert bolǵan. Kem degende 50 adam jaraqat alǵan, dep habarlaıdy QazAqparat Daily Sabah agenttigine silteme jasap.
Úsh polıtseı Baǵdat ortalyǵyndaǵy saýda ortalyǵynda eki jarylys bolǵanyn aıtty. Iraktyń memlekettik telearnasy jarylystardy jankeshti lańkester jasaǵanyn habarlady.
Jaraqat alǵandardyń kópshiliginiń jaǵdaıy aýyr. Aıtarlyqtaı materıaldyq zalal keltirilgeni habarlandy.
Qaýipsizdik kúshteri osy aımaqty qorshaýǵa aldy, jedel járdem qyzmetkerleri zardap shekkenderge kómek kórsetýde.
Mınıstrliktiń málimetinshe, alǵashqy jankeshti lańkes bazarǵa basa kóktep kirip, aınalasyna múmkindiginshe kóp adam jınalýy úshin óziniń jaǵdaıy jaman ekenin aıtqan.
«Sodan keıin ol ózin jaryp jibergen. Keıin ekinshi jankeshti lańkes óz bombasyn iske qosqan» delingen mınıstrlik habarlamasynda.
