Irak áskeri Mosýl qalasynyń 40 paıyzyn óz baqylaýyna aldy
ASTANA. QazAqparat - Irak áskeri Mosýl qalasynyń 40 paıyzyn óz baqylaýyna aldy. Bul týraly eldiń lańkestikke qarsy qyzmetiniń generaly málimdedi.
Onyń aıtýynsha, qazir shaharǵa kiretin kúre joldyń barlyǵy bılik áskeriniń qol astynda. Sondyqtan ondaǵy lańkester tolyqtaı qorshaýda qalǵan. Biraq sodyrlarǵa soqqy jasaý ázirge kidirip tur. Óıtkeni olardyń baqylaýyndaǵy aımaqta 600 myń beıbit turǵyn bar. Aıta ketken jón, Mosýl «Irak pen Levant lańkestik uıymynyń» beıresmı astanasy sanalady. Úkimet áskeri ony azat etýge ótken jyldyń qazanynda kirisken. Oǵan Irak jaýyngerlerimen birge AQSh basqaratyn halyqaralyq koalıtsııa jasaǵy da atsalysyp jatyr.
Derekkóz: "Habar 24" arnasy
