Irak armııasy eldiń batysynda lańkestikke qarsy keń aýqymdy operatsııa ótkizýde
ÁBÝ-DABI. 4 qańtar. QazAqparat - Irak armııasy Anbar provıntsııasy (Iraktyń batysynda) qaýymdastyǵynyń múshelerimen birlesip, keshe Fallýdja jáne Ramada qalalarynyń keıbir aýdandaryn basyp alǵan «Ál-Kaıdamen» baılanysty lańkestik toptarǵa qarsy iri operatsııa júrgizýde.
Arab BAQ-tarynan túsken málimetterge qaraǵanda, ırak polıtsııasy men ıslamısterdiń qaqtyǵysy kezinde júzden astam adam qazaǵa ushyraǵan. Iran ІІM-degi derekkóz úkimettik áskerler Ramada qalasynda ilgeri jyljyǵanyn jáne Fallýdja qalasynda jergilikti taıpalardyń qoldaýymen sodyrlar bekinisterin aýyr qarýlardan atqylaýdy jalǵastyrýda ekenin habarlady. Óz kezeginde, Fallýdja qalasyna bekingen sodyrlar jergilikti turǵyndardy yntymaqtastyqqa jáne qoldaýǵa shaqyrdy.
Budan buryn, qaza bolǵan sodyrlar arasynda Ál-Kaıdanyń «sur kardınaly» jáne onyń «Irak jáne Levanta ıslam memleketi» tarmaǵynyń kóshbasshysy Abdýl Rahman ál-Baǵdadı bar ekeni habarlanǵan bolatyn.
Osy jylǵy 2 qańtarda «Irak jáne Levanta ıslam memleketiniń» sodyrlary Fallýdja jáne Ramada qalalaryndaǵy on polıtseı ýchaskesin basyp alyp, tutqyndalǵan adamdardyń birqataryn shyǵaryp jiberdi. Jıhadshylar úkimettik mashınalardy órtep, óz blok-beketterin qoıyp jatqan áreketteri týraly beınerolıkterdi Internette jarııalady.
Iraktaǵy shıelenistiń ýshyǵýy iri ıslam qaýymdary - súnnıtter men shıitterdiń bir-birine qarsy turýymen baılanysty. Saddam Hýseınniń bıligi kezinde súnnıtter Iraktyń memlekettik qurylymdarynda basty oryndarda boldy, alaıda AQSh-tyń qarýly basyp-kirýi men S.Hýseın rejımi qulatylýynan keıin bılikke shıitter keldi. Qazirgi kezde Irak úkimetin shıit qaýymyna jatatyn premer-mınıstr Nýrı ál-Malıkı basqarady. Sonymen birge, Iraktaǵy shıeleniske kórshiles Sırııadaǵy aýqymdy konfessııaaralyq janjal tikeleı yqpal etýde.
