Irak alkogol ónimderin ákelýge, satýǵa jáne óndirýge tyıym saldy
AMMAN. QazAqparat - Irak bıligi alkogoldi ishimdikterdi óndirýge, elge ákelýge jáne satýǵa resmı túrde tyıym saldy, dep habarlaıdy QazAqparat Taıaý Shyǵys eliniń Ádilet mınıstrligine silteme jasap.
Ádilet mınıstrliginiń «Irak resmı gazeti» alkogoldi sýsyndardy satýǵa, ákelýge jáne óndirýge tyıym salatyn mýnıtsıpaldy ımport zańyn jarııalady.
Zańǵa sáıkes, bul sheshimdi buzǵan kez kelgen adam on mıllıon dınardan (3 mıllıon teńge) 25 mıllıon dınarǵa deıin (17 mıllıon teńgege jýyq) aıyppul tóleıdi. Zań 20 aqpannan qoldanysqa engizildi.
Búgingi tańda alkogoldi ishimdik shyǵaratyn kóptegen kompanııalar Baǵdad, Mosýl jáne Kúrdistan aımaqtarynda jumys isteıdi.
Irak, ásirese Sırııanyń soltústik-shyǵysyndaǵy kúrdter turatyn aýdandar úshin alkogoldiń negizgi óndirýshisi bolyp tabylady. Sebebi Irak ónimi Sırııa úkimetiniń baqylaýyndaǵy aýdandarda shyǵarylatyn alkogolmen salystyrǵanda áldeqaıda arzanyraq.
Irakta alkogol óndirý bıznesi saýda núkteleri esebinen ósti. Olar ónimdi el ishinde ǵana emes, sondaı-aq kórshiles Sırııa men Túrkııa qalalaryna jetkizip otyrdy.
Irakqa Saddam Hýseın basshylyq etken tusta musylmandarǵa alkogoldi ishimdik satýǵa tyıym salyndy, al basqa konfessııa ókilderi alkogoldi arnaıy lıtsenzııamen satatyn. Búginde Iraktaǵy ishimdik satatyn dúkenderdiń kópshiligi hrıstıandarǵa nemese ezıd qaýymdastyǵynan shyqqan adamdarǵa tıesili.
