Ippoterapııa medıtsınalyq ońaltýdyń klınıkalyq hattamasyna engizilmek

ASTANA. KAZINFORM — Ippoterapııa medıtsınalyq ońaltýdyń klınıkalyq hattamasyna engizilmek. Bul týraly Májilis depýtattarynyń saýalyna premer-mınıstr Oljas Bektenovtiń jaýabynda aıtylǵan.

— Ippoterapııa qyzmeti kepildendirilgen tegin medıtsınalyq kómektiń kólemi jáne mindetti áleýmettik medıtsınalyq saqtandyrý júıesi aıasynda (DSM-niń 2020 jylǵy 30 qazandaǵy № QR DSM-170/2020 buıryǵy) kórsetiletin qyzmetter tizbesine engizilgen. Qazirgi ýaqytta ıppoterapııany «Nevrologııa jáne neırohırýrgııa» (balalarǵa arnalǵan) beıini boıynsha emdeýdiń ekinshi kezeńinde medıtsınalyq ońaltýdyń klınıkalyq hattamasyna engizý máselesi qarastyrylýda, — dedi Oljas Bektenov.

Ippoterapııa — úıretilgen atpen júrý arqyly ońaltý ádisi. Ippoterapııanyń biregeıligi balalardyń psıhıkasyna áser etýdiń denege arnalǵan ádisteriniń úılesiminde jatyr. Emdik maqsatta atpen júrý balanyń denesine bıohımııalyq áser etedi, ony nyǵaıtady. Sarapshylar da ıppoterapııanyń keń spektrli aýrýlarǵa shaldyqqan balalardy damytý men ońaltýdyń erekshe ádisteriniń biri ekenin moıyndaıdy. Jylqy múmkindigi shekteýli, súıek-bulshyq et júıesinde aqaýy bar, sondaı-aq, psıhıkalyq derti bar balalarǵa oń áser etedi.

Buǵan deıin Jetisý oblysynda erekshe balalarǵa arnalǵan tuńǵysh ıppoterapııa ortalyǵy ashylǵanyn jazǵan edik.