Ipotekanyń mólsherlemesi tómendeýi tıis - ıpotekalyq kompanııa
«Endi, ıpotekalyq naryqta qandaı ózgeristerdiń bolatynyn dóp basyp, aıtý kerek. Ony Siz de, biz de aıta almaımyz. Degenmen, qazirgi ıpotekanyń stavkalary túsýi kerek dep oılaımyz. Sebebi búgingideı mólsherlememen ekonomıkaǵa úlken salmaq túsedi. Ony bárimiz jaqsy túsinemiz», - dedi Á.Muxamedjanov QazAqparat tilshisine bergen suxbatynda.
Aıta ketken jón, búginde «Nurly jer» baǵdarlamasy aıasynda Qazaqstannyń ıpotekalyq kompanııasy turǵyn úı zaımdaryn sýbsıdııalaıdy. Nesıe alýshy úshin sońǵy ári naqty mólsherleme 10 paıyz bolady, qalǵany memlekettiń tarapynan óteledi. Bıyl sýbsıdııalaý baǵdarlamasy bastalǵaly beri 1 209 ótinim kelip túsken. Kelesi jyly ekinshi deńgeıli bankter arqyly taǵy 7 myńǵa jýyq arzan ıpotekany berý josparlanǵan. Jalpy, barlyq zaımdardy sýbsıdııalaýǵa 120 mlrd teńge jumsalady.
«Osy adamdardyń barlyǵyn sýbsıdııalaǵannan keıin ıpotekanyń mólsherlemesi de tómendeýi múmkin. Olaı bolmasa, qazirgi baǵdarlamany ary qaraı jalǵastyratyn bolamyz», - dep atap kórsetti kompanııa basshysy.
