Ipotekanyń quny 10 paıyzǵa deıin tómendeıdi
ASTANA. QazAqparat - Memleket ıpotekanyń qunyn jańa qurylystan páter satyp alý úshin 10 paıyzǵa deıin jáne jeke turǵyn úı satyp alý úshin 5 paıyzǵa deıin tómendetedi. Osy oraıda, ekinshi deńgeıli bankterge memleket sýbsıdııany «Qazaqstan Ipotekalyq Kompanııasy» IU» AQ arqyly usynatyn bolady.
Aıta keteıik, «Qazaqstan Ipotekalyq Kompanııasy» IU» AQ-nyń mıssııasy qarjy operatory retinde ıpotekalyq nesıe berý tetikteri arqyly Qazaqstan Respýblıkasynyń turǵyndary úshin qoljetimdi turǵyn úımen qamtamasyz etý salasynda memleket saıasatyn iske asyrý, «Strategııa - 2050» jáne memlekettik baǵdarlamalarmen qoıylǵan áleýmettik baǵdarlanǵan mindetterdi sheshý maqsattarynda jalǵa beriletin turǵyn úıdi halyqtyń basym kópshiligine usyný arqyly halyqtyń turǵyn úımen qamtamasyz etilýin arttyrý bolyp tabylady.
Halyqty turǵyn úımen qamtamasyzdandyrý jáne turǵyn úı qurylysyna qoldaý kórsetý úshin jańa «Nurly jer» baǵdarlamasy ázirlenip, qabyldandy. Ol bes negizgi mindetti iske asyrýdy kózdeıdi:
1) ıpotekalyq kredıtteýdiń qoljetimdiligin arttyrý;
2) jeke qurylys salýshylardy turǵyn úı salýǵa yntalandyrý;
3) turǵyn úı qurylys jınaq júıesi arqyly kredıttik turǵyn úı salý;
4) halyqtyń áleýmettik jaǵynan osal toptary úshin satyp alý múmkindiginsiz jalǵa beriletin turǵyn úı salý;
5) jeke turǵyn úı qurylysyn damytý.
Esterińizge sala keteıik, Qazaqstan respýblıkasynyń prezıdenty N.Á. Nazarbaevtyń 2016 jyldyń sońynda Úkimet «Nurly jer» birińǵaı turǵyn úı qurylys baǵdarlamasyn ázirlendi Baǵdarlama qazaqstandyq otbasylardy qoljetimdi turǵyn úımen qamtamasyz etýge arnalǵan.
Aıta ketý kerek, turǵyn úı salasynda buǵan deıin bolǵan barlyq mehanızmder «Nurly jer» baǵdarlamasyna engizildi. Turǵyn úı jınaq pen ıpotekadan bólek, jeke turǵyn úıdi salý júıesi de bar. Baǵdarlamanyń negizgi maqsaty - osy salany naryqqa barynsha beıimdeý.
Baǵdarlamanyń negizgi baǵyty - jeke turǵyn úı qurylysyna qoldaý kórsetý. Ol úshin azamattarǵa daıyn ınjenerlik ınfraqurylymy bar jer ýchaskeleri bólinetin bolady. Infraqurylymdy salýdy memleket qamtamasyz etedi.
Sonymen qatar áleýmettik jaǵynan osal toptar úshin satyp alý múmkindiginsiz jalǵa beriletin turǵyn úı salynatyn bolady. Jyl saıyn jalǵa beriletin turǵyn úı salýǵa 25 mlrd. teńge bólinip turady.
Al «Nurly jer» baǵdarlamasyna qatysamyn deıtin azamattar aldymen halyqqa qyzmet kórsetý ortalyǵyna barýy tıis. Sol jerde ótinish berip, ákimdiktiń kezegine turý qajet. Degenmen, baspana eń birinshi ardagerlerge, jetim balalarǵa, áleýmettik jaǵynan az qamtylǵandarǵa, memlekettik qyzmetshiler men bıýdjet salasynyń mamandaryna beriledi. Áleýmettik jaǵynan az qamtylǵan azamattar da 11 sanatqa bólinedi. Ol - kópbalaly otbasylar, tolyq emes otbasylar jáne taǵysyn taǵy. Olar da ótinish berip, kezekke turýy tıis. Alaıda naqty shekteýlerdiń de bar ekenin eskerý kerek. Sońǵy bes jylda adamnyń atynda baspana bolmaýy shart. Ol - bir. Sosyn Astana men Almatyda tirkeýge turý merzimi 2-3 jyl bolýy qajet.
15 jyl ishinde (2017-2031 jyldary) 1,5 mln. otbasy úshin turǵyn úı salý, onyń ishinde 600 myń jeke turǵyn úı jáne 972 páter salý kútilip otyr.
Aǵymdaǵy jyly «Nurly jer» baǵdarlamasynyń sheńberinde 10,0 mln. sharshy metrden astam turǵyn úı (100 myń páter), onyń ishinde memlekettik ınvestıtsııalar esebinen
1,6 mln. sharshy metr (28 myń páter) paıdalanýǵa beriledi dep josparlanýda.
Aıta keteıik, búgingi tańda respýblıka boıynsha baspana kezeginde 2 mln. 300 myń adam tur. Olardyń ishinde 430 myń adam ákimdikterdiń kezeginde tursa, shamamen 800 myń adam - Turǵyn úı qurylys jınaq bankiniń salymshylary. Budan bólek, 1 mln. 300 myń adam jer kezegine tirkelgen.
