Ipotekany sýbsıdııalaý jobasy nege qoldaý tappady – «Báıterek» basshysynyń jaýaby

ASTANA. QazAqparat – «Báıterek» ulttyq basqarýshy holdınginiń basqarma tóraǵasy Qanat Sharlapaev «7-20-25» baǵadarlamasynyń ornyna engiziledi delingen ıpotekany sýbsıdııalaý jobasy nege aıaqsyz qalǵany týraly pikir bildirdi, dep habarlaıdy QazAqparat tilshisi.

«Men Qarjy mınıstrliginiń áreketine pikir bildire almaımyn. Ony mınıstrdiń ózine qoıa alasyzdar. Óıtkeni bul sheshimderiniń qısyny qandaı la bir sebeptermen baılanysty shyǵar», - dedi Qanat Sharlapaev.

Sondaı-aq, ol qazirgi kommertsııalyq ıpeotakalardy sýbsıdııalaý qajettigi neden týyndap turǵanyn túsindirdi.

«Mundaı uzaq merizmdegi josparlar túrli máselelerdiń úılesimimen jasalady. Birinshiden, biz nege ıpotekany damytý kerek dep esepteımiz? Óıtkeni ıpoteka tek qazirgi naryqtaǵy mólsherleme boıynsha ǵana berilse, Qazaqstan halqyna baspanaly bolý shynymen alynbas asýǵa aınalady. Bul shynymen qıyn. Sondyqtan biz ıpotekany sýbsıdııalaýdy usynǵanbyz. Sonda paıyzdyq mólsherlemeler qalypqa keledi dep esepteımiz. Bul sheshim men usynys qazirgi paıyzdyq mólsherlemelerge baılanysty týyndaǵan», - dedi holdıng basshysy.