Ipotekanyń paıyzdyq mólsherlemesi bastapqy jarnaǵa qaraı árkelki belgilenýi múmkin

ASTANA. KAZINFORM — Qarjy naryǵyn retteý jáne damytý agenttiginiń tóraǵasy Mádına Ábilqasymova ıpotekanyń paıyzdyq mólsherlemesin LTV kórsetkishke baılaý týraly bastamanyń mánin túsindirdi.

Úkimet otyrysynda Ulttyq bank tóraǵasy Tımýr Súleımenov 2026 jyldyń 1 shildesinen bastap ıpotekanyń paıyzdyq mólsherlemesin LTV kórsetkishke baılaý kózdelip otyrǵanyn aıtqan. Baspasóz máslıhatynda jýrnalıster osy mehanızmniń mánin surady.

— Biz bul máseleni Qarjy naryǵyn retteý jáne damytý agenttigimen birlesip qarastyryp jatyrmyz. Qazir ıpoteka nesıeleriniń shekti paıyzdyq mólsherlemesi shartty túrde 25 paıyz deńgeıinde belgilengen. Ázirge osy deńgeıdi saqtaý turamyz dep sheshtik. Óıtkeni bazalyq mólsherleme kóterildi. Ondaı kezeńde ıpotekanyń marjasyn odan ári taryltý qısynǵa syıyńqyramaıtyn edi. Biraq biz 1 shildege deıin jeke bir ádisteme ázirleımiz. Ol ádistemede ıpotekanyń paıyzdyq mólsherlemesi 25-ten joǵary nemese 25-ten tómen degen qarabaıyr ólshemmen bekitilmeıdi. Ipoteka qandaı tásilmen alynyp jatqanyn qaraımyz. ıAǵnı bastapqy jarnaǵa baspana qunynyń neshe paıyzyn salǵanyn, neshe jylǵa alǵanyn qaraımyz. Al qazirgi ádisteme tym tóte. Onyń naqty tetikterin keıin tolyq jarııalaımyz, — dedi Tımýr Súleımenov.

Mádına Ábilqasymova ıpotekanyń paıyzdyq mólsherlemesin LTV-koeffıtsentke baılaý halyqty nesıege júgire bermeı, bastapqy jarnaǵa jaqsylap aqsha jınaqtaýǵa yntalandyrý úshin engiziletinin aıtty.

— Bul ıpoteka kepildiginiń ekinshi qyry deýge bolady. Mysaly, LTV kórsetkishi 70 paıyz desek, alǵashqy jarnaǵa 30 paıyz salyp, qalǵanyn ıpoteka retinde aldyńyz degen sóz. Bastapqy jarnańyz neǵurlym kóp bolsa, alatyn nesıeńiz soǵurlym az bolady. Sáıkesinshe paıyzdyq mólsherlemeni de barynsha tómen etýge bolady. Negizgi tásil osyndaı prıntsıpke qurylady. Basqasha aıtsaq, burynǵydaı 25 paıyz degen jalǵyz mólsherleme bolmaıdy. Negizinen biz qazaqstandyqtardy bastapqy jarnany kóbirek salýǵa yntalandyrýǵa kúsh salamyz. Onyń ishinde bankterde jınaqtaý tetigin damyta túsemiz. Birneshe bank osyndaı ónimderdi usyna bastady, — dedi agenttik basshysy.

Aıta ketý kerek, búgin Úkimettiń, Ulttyq Banktiń jáne Qarjy naryǵyn retteý agenttiginiń makroekonomıkalyq turaqtandyrý jáne halyqtyń ál-aýqatyn arttyrý jónindegi 3 jyldyq birlesken is-qımyl baǵdarlamasy tanystyryldy. 

Osydan buryn Ábilqasymova 2026 jyldan bastap korporatıvtik tabys salyǵynyń saralanǵan stavkalary engiziletinin aıtty.