Ipotekany tóleı almaı qalǵandarǵa qandaı kómek kórsetiledi — sarapshy keńesi
ASTANA. KAZINFORM — Otbasy bankte ıpotekalyq nesıesi boıynsha tólemdi keshiktirgen qaryz alýshylardyń úlesi - nebári 0,13%. Bul týraly BIZDIÑ ORTA podkastynda «Otbasy bank» AQ basqarma tóraǵasynyń orynbasary Jansultan Mataı málim etti.
— Búginde Otbasy banktegi 90 kúnnen astam merzimi ótken ıpotekalyq qaryzdardyń (NPL) úlesi - nebári 0,13 paıyz. Bul - óte tómen kórsetkish. Al ekinshi deńgeıli bankterde mundaı nesıelerdiń ortasha úlesi - 4,5-5 paıyz shamasynda, keıbirinde odan da joǵary. Bizdiń klıentter qandaı jaǵdaı bolsa da, eń aldymen baspanasyn saqtap qalýǵa tyrysady, — dedi Jansultan Mataı.
Onyń aıtýynsha, qaryz alýshy qıyn ómirlik jaǵdaıǵa tap bolǵan kezde bank birden óndirip alý sharalaryn qoldanbaıdy. Árbir ótinish jeke qaralyp, aldymen qaryzdy qaıta qurylymdaý nemese tólemdi keıinge shegerý múmkindigi usynylady.
Sarapshy tabysy ýaqytsha tómendegen azamattarǵa alty aıǵa deıin negizgi qaryzdy óteýdi keıinge qaldyrý nemese nesıe merzimin uzartý arqyly aı saıynǵy tólem kólemin azaıtý tetikteri qarastyrylǵanyn aıtady.
Tek barlyq múmkindik sarqylǵan jaǵdaıda ǵana kepildegi turǵyn úıdi satý nemese sot tártibimen óndirip alý máselesi qaralady. Alaıda, spıkerdiń aıtýynsha, mundaı jaǵdaılar bank portfelinde óte sırek kezdesedi.
Aıta keteıik, buǵan deıin, Qazaqstandaǵy ıpoteka naryǵyndaǵy qazirgi ahýaly jaıly jazǵan edik.
