«Ipotekamen kómektesemin»: Nur-Sultan turǵyny 2,2 mln teńgesinen aıyryldy

NUR-SULTAN. QazAqparat – Elordada polıtseıler qala turǵynyn ıpoteka rásimdeý boıynsha aldaǵan alaıaqty quryqtady, dep habarlaıdy QazAqparat tilshisi.

«Polıtsııaǵa ıpoteka rásimdeý máselesinde aldanǵan elorda turǵyny júgindi. Belgili bolǵandaı, onyń tanysy ıpoteka rásimdeýge kómek kórsete alatynyn aıtqan. Bıyl sáýir aıynda kúdikti óziniń qyzmeti úshin 2 mln 200 myń teńge alyp, osy ýaqytqa deıin ýádesin oryndamaǵan. Aldanyp qalǵan áıeldiń aıtýynsha, tanysy ekinshi deńgeıli bankterde bul máseleni sheshe alatyn adamdary bar ekenin aıtyp sendirgen», - delingen qalalyq Polıtsııa departamentiniń málimetinde.

Uzaq kútken ıpotekasynan nátıje bolmaǵasyn, áıel kúdiktige qatysty polıtsııaǵa aryz túsirgen.

Jedel izdestirý is-sharalary barysynda kúdikti quryqtalyp, «alaıaqtyq» baby boıynsha qylmystyq is qozǵaldy.