Ipotekalyq zaımdardy qaıta qarjylandyrý baǵdarlamasy aıasynda 503 soltústikqazaqstandyq memleketten qoldaý tapty
PETROPAVL. QazAqparat - Elimizde ıpotekalyq zaımdardy qaıta qarjylandyrý baǵdarlamasy qabyldanǵaly shamamen bir jyl ótti. Osy ýaqyt aralyǵynda ótinish bergen 650 soltústikqazaqstandyqtyń 503-i memleketten qoldaý tapty. Bular 2004-shi jyldyń qańtary men 2009-dyń jeltoqsan aılary aralyǵynda páter alǵandar, dep habarlady mtrk.kz.
Jomart Qajyraqymov - «QR Ulttyq banki» SQOF dırektory:
- Bul oblys boıynsha barlyq qaryzdardyń 10 paıyzy. Bankter quptaǵan ótinishterdiń 95 paıyzy qaıta qarjylandyryldy. Al respýblıka boıynsha bul kórsetkish 82 protsent.
Al 65 jerlesimizge qarjy ınstıtýttary qaıta qarjylandyrýdan bas tartqan. Olar arnaıy qurylǵan komıssııanyń kómegine júgingen. Atalmysh uıym osy kúnge deıin 37 ótinishti esh ózgerissiz qaldyrdy, 28-in bankterge qaıta qaraýǵa jóneltipti. Al 17 zaemshyǵa memleket qaryzyn tóleýge kómektesedi. Búgingi otyrysta komıssııa músheleri úsh ótinishti qarastyrdy. Vasılıı Sýstavov ıpotekany 2007-shi jyly rásimdep, 15 jylǵa 30 myń dollar alǵan. Azamat qaryzyn bir kúnge de qaldyrmaı ýaqytyly tólep otyrǵan. Sol sebepti bank eski kýrspen ony qaıta qarjylandyrýdan bas tartypty. Al qazirgisi Vasılıı Sýstavovtyń qaltasyn qaǵýda.
Vasılıı Sýstavov:
- Men buryn 43 myń tólegenmin, al qazir 90 myń. Bul men úshin tıimsiz.
Baǵdarlamanyń sharty boıynsha zaemshyǵa komıssııa músheleri kómektese almady. Al qalǵan eki suraqty bankterge qaıta qarastyrýǵa jiberdi. Aıta ketý qajet, jýyrda qaıta qarjylandyrý baǵdarlamasyna ózgertýler engizildi. Endi budan bylaı jobaǵa qatysýshy bankterdiń sany 9-dan 19-ǵa artty.
Muhtar Mankeev - oblys ákiminiń orynbasary:
- Qaryz alýshynyń kepilde turǵan jalǵyz baspanasynan bólek, taǵy da bir jer telimi bolsa, ondaı qaryzdar qaıta qarjylandyrý múmkinshiligin alyp otyr. Sonymen qatar qaryz alýshynyń kepilde turǵan jyljymaıtyn múligi turǵyn úıge jatpasa, ondaı da qaryz alýshylar qaıta qarjylandyratyn bolady.
Jalpy qaıta qarjylandyrý baǵdarlamasyna Ulttyq bank óz qazynasynan 130 mlrd teńge bólgen eken. Bul joba ústimizdegi jyldyń jeltoqsanyna deıin jalǵasady.
