Ipotekalyq turǵyn úı qaryzdaryn qaıta qarjylandyrý boıynsha qabyldanǵan aryzdardyń sany 12 myńnan asty - QR Ulttyq banki
ALMATY. QazAqparat- Ipotekalyq turǵyn úı qaryzdaryn/ıpotekalyq qaryzdardy qaıta qarjylandyrý baǵdarlamasy boıynsha qabyldanǵan aryzdardyń sany - 12 myńnan asty. Bul týraly búgin QR Ulttyq bankiniń baspasóz qyzmetinen habarlady.
«Jalpy somasy 40,3 mlrd. teńge bolatyn 7 myń aryz boıynsha oń sheshim qabyldandy. Al kúni búginge deıin jalpy somasy 19,6 mlrd. teńge bolatyn 4188 aryz boıynsha qaryzdar qaıta qarjylandyryldy», - delingen habarlamada.
Qaıta qarjylandyrý baǵdarlamasy boıynsha aryzdar men qujattardy qabyldaý jumysy jalǵasyp jatyr. Bul meılinshe kóp ýaqytty alatyn úderis. Baǵdarlamany júzege asyrý boıynsha derekter qory kún saıyn ulǵaıyp jatyr. Baǵdarlama boıynsha aryzdaryn qaıta qarjylandyrýǵa nıet bildirgender ekinshi dárejeli bankke múmkindiginshe tezirek ótinim berýleri tıis.
«Baǵdarlama boıynsha sheshimin tappaǵan máseleler bar. Olarǵa Úkimettiń sheshimi qajet. Solardyń ishinde mysaly salyq salý jáne ásirese múlikke tyıym salynǵan jaǵdaıda qujattardy qalaı zańdyq turǵyda rásimdeý máselelerin aıtýǵa bolady. Bul naqty sheshimdi talap etetin máseleler», - dedi osyǵan oraı QR Ulttyq bankiniń Qarjylyq qyzmetterdi tutynýshylar quqyǵyn qorǵaý jónindegi Departamentiniń dırektory Aleksandr Terentev.
Onyń aıtýynsha, qazirgi tańda bul baǵdarlamany belgilengen talaptar boıynsha júzege asyrý qajet. Tek sodan keıin ǵana baǵdarlama talaptaryna saı keletin qaryz alýshylardyń qataryn keńeıtýge bolady.
Aıta ketelik, bıyl memleket basshysynyń tapsyrmasyn iske asyrý barysynda Ulttyq Bank ekinshi deńgeıdegi bankterdiń ıpotekalyq turǵyn úı qaryzdaryn/ıpotekalyq qaryzdardy qaıta qarjylandyrý úshin 130,0 mlrd. teńge bólingen bolatyn.
Sodan, Ulttyq Bank Basqarmasynyń 2015 jylǵy 24 sáýirdegi № 69 qaýlysymen Ipotekalyq turǵyn úı qaryzdaryn/ıpotekalyq qaryzdardy qaıta qarjylandyrý baǵdarlamasy bekitildi.
Baǵdarlamanyń maqsaty - qaryz alýshylardyń (kepil berýshilerdiń) kepilge berilgen jalǵyz turǵyn úıin saqtaý, qaryzdy óteýde qaryz alýshylardyń eń kóp sanyna járdemdesý jáne problemalyq kredıtterdiń úlesin tómendetý bolyp tabylady.
