Ipotekalyq nesıeni bala sanyna qaraı sýbsıdııalaýdy engizgen mańyzdy - A. Turtaev
ASTANA. 6 qarasha. QazAqparat - Ipotekalyq nesıeni bala sanyna qaraı sýbsıdııalaýdy engizgen mańyzdy. Búgin Parlament Májilisiniń jalpy otyrysynda Úkimet basshysynyń atyna saýal joldaǵan depýtat Almas Turtaev osylaı málim etti.
«Adam resýrsy - eń basty qundylyq. Elbasynyń «Qazaqstan-2030», «Qazaqstan-2050» strategııalyq baǵdarlamalarynda, elimizdegi demografııalyq ósimdi jáne azamattarymyzdy jan-jaqty áleýmettik qamsyzdandyrý týraly naqty maqsattar kózdelgen. Alaıda, búgingi kúni qoldanysta eshqandaı demografııalyq damý baǵdarlamasy joq ekendigin jasyrmaýymyz kerek», - deıdi depýtat A. Turtaev.
Onyń aıtýynsha, elimizde sońǵy on jylda demografııalyq jaǵdaı oń óris alyp otyr. Mysaly, halyq sany 2 mıllıonǵa jýyq ósip, týý kórsetkishi men qaıtys bolǵan azamattardyń sanynyń qatynas dınamıkasy jaqsara túsken.
«Degenmen, elimizde jasy 25-ten joǵary otbasyn qurmaǵan azamattarymyzdyń sany - 3 mıllıonǵa jýyq. Adam ómirindegi basty qundylyq - shańyraq kóterip, otbasyn qurý, urpaq órbitý. Kazirgi tańda jastarymyz, aldymen jeke bastyń qajettiligin birinshi kezekke qoıady. Bul - zańdylyq. Óıtkeni otbasyn qurý úshin, aldymen baspana máselesin sheship alý qajet. Qazirgi ýaqytta demografııalyq problemaǵa tap bolyp otyrǵan álemdegi kóptegen memleketter túrli yntalandyrý jumystary arqyly jeńildikter qarastyryp, demografııalyq ósimdi qamtamasyz etý maqsatynda zańdaryna ózgerister engizip, qabyldaý máselesin kún tártibinen túsirmeı keledi», - deıdi A. Turtaev. Osyǵan oraı, depýtat demografııalyq ósimdi yntalandyrý jáne jastar arasyndaǵy basty máseleni sheshý quraly retinde bala týýǵa baılanysty ıpotekalyq nesıege memlekettik sýbsıdııa jasaý qajettigin alǵa tartady. «Mysaly, birinshi balany týǵan kezde - nesıe somasynyń 30%-y mólsherinde, ekinshi balany týǵan kezde - nesıe somasynyń 50%-y mólsherinde, úshinshi balany týǵan kezde - nesıe somasynyń 80%-y mólsherinde, tórtinshi balany týǵan kezde - ıpotekalyq nesıeni memleket tolyq jabý múmkindigin qarastyrýdy suraımyz. Elimizdegi demografııalyq jaǵdaıdy retteıtin arnaıy memlekettik baǵdarlama joqtyǵyn eskere otyryp, osy baǵyttaǵy máselelerdi keshendi túrde sheshý úshin, qazirgi zaman talaptaryna jaýap bere alatyn demografııalyq damý baǵdarlamasyn qabyldaý qajet dep esepteımiz», - dedi depýtat.
