Ipotekalyq nesıelerdi saqtandyrýdyń standarttalǵan sharttary engizilmek
ASTANA. KAZINFORM – Elimizde ıpotekalyq nesıelerdi saqtandyrýdyń standarttalǵan sharttary engizilmek. Bul týraly Qarjy naryǵyn retteý jáne damytý agenttigi tóraǵasynyń orynbasary Marııa Hadjıeva aıtty.
— Saqtanýshylardyń quqyqtaryn qorǵaýdyń qosymsha sharalaryn qabyldaý josparlanyp otyr. Bank nesıelerin alý kezindegi saqtandyrý shyǵyndaryn azaıtý maqsatynda bank nesıelerimen baılanysty saqtandyrý sharttary boıynsha saqtandyrý agentteriniń komıssııasy saqtandyrý syılyqaqysy somasynyń 10 paıyzynan aspaýy tıis ekendigin kózdeıtin zańnamalyq túzetýler ázirlendi. Bul túzetýler osy jyldyń qazan aıynda kúshine enedi dep kútilip otyr, — dedi ol Ortalyq kommýnıkatsııalar qyzmetindegi brıfıngte.
Sonymen qatar ol ıpotekalyq nesıelerdi saqtandyrý boıynsha standarttalǵan sharttardy engizý múmkindigi qarastyrylyp jatqanyn aıtady.
— Bul qaryz alýshylar úshin saqtandyrý qyzmetterin usynýǵa biryńǵaı talaptar men tásilderdi qurýǵa múmkindik beredi. Atalǵan jańashyldyq ashyqtyqty qamtamasyz etedi jáne saqtandyrýdy rásimdeý protsesin jeńildetedi. Agenttik sondaı-aq erikti saqtandyrý sharttaryna qoıylatyn negizgi talaptardy belgileý boıynsha zańnamalyq túzetýlerdi daıyndady. Bul saqtanýshylardyń múddelerin qorǵaýdy qamtamasyz etedi. Qajetsiz nemese tıimsiz saqtandyrý sharttaryn tańý, tólemsiz saqtandyrý sharttaryn jasasý jáne saqtandyrý tólemderin negizsiz keshiktirý múmkindigin boldyrmaıdy, — dedi Marııa Hadjıeva.
Aıta keteıik, 2024 jyly saqtandyrý uıymdarynyń jıyntyq aktıvteri 3,2 trln teńgege jetti.