Ipotekalyq mólsherlemeni tómendetý 1 qarashaǵa deıin shegerildi

ASTANA. KAZINFORM — Qazaqstanda ıpoteka boıynsha mólsherlemeni 25%-dan 20%-ǵa deıin tómendetý normasynyń kúshi ýaqytsha toqtatyldy. Tıisti qaýly jobasy Qarjy naryǵyn retteý jáne damytý agenttiginiń portalynda jarııalanǵan.

Agenttik saıtyndaǵy aqparatqa sáıkes, ıpotekalyq qaryzdar boıynsha eń joǵary mólsherlemeni 25%-dan 20%-ǵa deıin tómendetý týraly tarmaqtyń qoldanylýy 2025 jylǵy 1 qarashaǵa deıin toqtatyldy.

— «Jyldyq tıimdi syıaqy mólsherlemesiniń shekti mólsherlerin aıqyndaý týraly» Qazaqstan Respýblıkasy Qarjy naryǵyn retteý jáne damytý agenttigi basqarmasynyń 2024 jylǵy 16 tamyzdaǵy № 62 jáne Qazaqstan Respýblıkasy Ulttyq Banki basqarmasynyń 2024 jylǵy 19 tamyzdaǵy № 45 birlesken qaýlysynyń 1-tarmaǵynyń qoldanysy 2025 jylǵy 1 qarashaǵa deıin toqtatyla tursyn, — delingen qujatta.

Osy kezeńde burynǵy shekti mólsherlemeler qoldanysta qala beredi:

• ekinshi deńgeıli bankter men jekelegen bank operatsııalaryn júzege asyratyn uıymdar beretin banktik qaryzdar boıynsha — 46% ;

•  kepilmen qamtamasyz etilgen banktik qaryzdar boıynsha — 35%;

• ıpotekalyq turǵyn úı qaryzdary boıynsha — 25%;

• mıkroqarjylyq qyzmetti júzege asyratyn uıymdar beretin mıkrokredıtter boıynsha — 46%;

• mıkroqarjylyq qyzmetti júzege asyratyn uıymdar kúntizbelik qyryq bes kúnge deıingi merzimge, respýblıkalyq bıýdjet týraly zańda tıisti qarjy jylyna belgilengen aılyq eseptik kórsetkishtiń qyryq bes eselengen mólsherinen aspaıtyn mólsherde beretin mıkrokredıtter boıynsha kúnine 0,3 paıyzdan az, biraq 179 paıyzdan aspaıtyn mólsherde bolyp aıqyndalǵan.

Osy qaýly alǵashqy resmı jarııalanǵan kúninen bastap qoldanysqa engiziledi.

Buǵan deıin ıpoteka boıynsha jyldyq tıimdi syıaqy mólsherlemesi 20%-ǵa tómendegeni belgili boldy.